IKATULO NA NGA ADLAW

Pag-iway sa kabataan sa peligro:

Klase sa tanang lebel gisuspenso

TAGBILARAN CITY, Bohol, Oct 23 (PIA)—Kay nagpabilin pa nga giisa ang Tropical Cyclone Wind Signal (TWCS) No, 1 ibabaw sa Bohol ug sa kinatibuk-ang kabisay-an, padayon nga gisuspenso sa klase sa tanang lebel sa pagtungha sa publiko ug pribado nga mga tunghaan.

Matud sa pahibaw nga giluwatan ni Gobernador Erico Aristotle Aumentado, suspendido gihapon ang mga klase ugmang adlawa, Oktubre 24, 2024, sa kindergarten, elementary, secondary, ug higher education (college) institutions sa tibuok Probinsya sa Bohol, pampubliko man o pribado.

Tungod gihapon kini sa kusog nga hangin ug mga uwan nga dala ni Severe Tropical Storm Kristine, ilabi na nga anaa gihapon kita sa Signal No. 1.

Susama sa unang mga anunsyo, magpabilin gihapon kitang magbinantayon sa palibot, maminaw sa mga katikaran gikan sa inyong Kagamhanang Probinsyal ug mga LGUs, ug mag-ampo kita ngadto sa Labaw'ng Makagagahum aron mapalayo kita gikan sa mga disgrasya, dala sa kusog nga bagyo nga si Kristine, padayag sa gobernador.

Segun sa Tropical Cyclone Weather Bulletin No 14 nga giluwatan sa PAG-ASA sa alas 8:00 sa gabii, Oktubre 23, ang Bohol sama sa kinatibuk-ang kabisay-an, anaa pa gihapon sa TCWS No 1, diin masinati ang kusog nga hangin nga mahimong moabut sa 39 nagdto sa 61 kilometros matag oras (Beaufort 6 ngadto sa 7) sulod sasunod nga 36 ka oras.

Kini bisan pa nga ang bagyo nga si Kristine, nagpadayon sa iyang gikusgon samtang nagkaduol na sa mga kabaybayonan sa Isabela, Oktubre 23 sa alas 7:00 sa gabii.

Segun sa kasayuran ga gipagawas sa state weather bureau, sa may alas 7:00 sa gabii, ang sentro sa kusopg nga bagyo ang si Kristine gibanabana base sa mga ekipos ug kahimanan nga nagtutok niini nga anaa na sa 150 km kasubangan sa Echague, Isabela (16.9°N, 123.1°E).

Gitakin gihapon sa bagyo ang labing kusog nga lahutay nga paghuros nga moabut sa 95 km/h duol sa mata niini, ug kalitkalit nga bul-og sa hangin nga moabut sa 115 km/h, samtang ang central pressure niini, anaa sa 985 hectoPascals.

Wala na man unta’y angayan pang kahingawahan ang mga taga Bohol kay layo na ang bagyo, ug nagpadayon sa rumbo niini nga pa-amihanang kasadpan, sa gikusgon nga 15 km/h, apan ang kalapdon sa panganod nga nahigop ni Kristine, misanap pa sobra sa 730 kilometros gikan sa mata sa bagyo.

Sa nagpadayon nga storm signal, padayon pa gihapon usab ang pagsuspenso sa mga byahe sa tanan nga pasaheroan nga sakyanan sa bukas nga kadagatan. (PIABohol)