CSC gipahinumdoman ang mga empleyado sa

gobyerno nga dili moapil sa partisan politics

TAGBILARAN CITY, Bohol (PIA)--Gipahinumdoman sa Civil Service Commission (CSC) ang mga empleyado sa gobyerno nga magpabiling neutral sa politika ug dili magapil-apil sa mga aktibidad nga may kalabotan sa pangampanya alang sa eleksyon karong Mayo.

Base sa Joint Circular No. 1 series of 2016 sa Commission on Elections (Comelec) ug CSC, ginadili sa mga kawani sa gobyerno ang mosunod: pagsalmot sa mga grupo o aktibidad alang sa pangampanya, pagpahigayon og political rallies o meetings, pagsulti sa media aron suportahan o batokan ang usa ka kandidato ug pagpanghatag o pagpakita og mga campaign materials.

Apil usab ang direkta o dili direktang pagkolekta og boto, paggamit og government resources alang sa politika, paghatod og pondo o materyales sa mga kandidato, pagsuot og campaign-related items nga walay pagtugot sa Comelec ug pagsilbi isip watcher sa usa ka kandidato o partido.

Sakop usab niining patakaran ang tanang mga empleyado bisan naka-leave.

Ang bisan kinsang mapamatud-an nga molapas niining mga patakaran pahamtangan og silot nga usa ka buwan ug usa ka adlaw hangtod sa unom ka buwang suspensiyon sa unang paglapas.

Samtang dismissal o pagkatangtang sa serbisyo ang ipahamtang sa ikaduhang paglapas. (ecb/PIA7-Bohol)