Gikan sa yellow area of concern

4 lungsod sa Bohol,

green category na

TAGBILARAN CITY, Bohol, (PIA)—Gilibkas na sa Commission on Elections (Comelec) ang upat ka lungsod sa Bohol gikan sa kategorya nga yellow area of concern ngadto na sa green.

Sa gipagawas nga kasayuran sa Comelec pinetsahag Marso 11, 2025, gitangtang na sa yellow area of concern ang Baclayon, Candijay, Pilar ug Ubay, samtang kining nga lungsura, gihimo na nga green area of concern.

Matud pa sa Comelec, sa Resolution No. 11067, gimanduan niini ang Philipine National police ug ang Armed Forces of the Philippines sa paghatag og classification sa tanang lugar sa nasud base sa upat ka kategorya: Green, yellow, Orange ug red.

Ang mga lugar nga ubos sa green category, kini maoy nga wala nay security concerns ug nakit-an nga malinawon na mao nga makasalig na sa kahapsay sa paghimo sa piniliay.

Ang mga lugar nga anaa sa yellow, mao kadtong dihay nataho o gidudahang may election related incidents sa katapusang duha ka piniliay, ang nataho nga kagubot, kalabut sa politika ug walay kalambigitan ang local nga mga komunista.

Yellow usab kadtong mga lugar nga kanhi napahimutang sa Comelec Control ug nataho nga may mga armado nga mga supporter sa magka-atbang nga mga kandidato.

Sa mga lugar nga anaa sa Orange category, dinhi may namatikdan o nataho nga kombinasyon sa armadong mga dumadapig ug init nga siningkiay sa politika, o napailawom na sa Comelec control ug gihulga sa mga grupong local nga komunista o mga pundok nga tigpanghulga.

Ang red category kadtong mga lugar nga adunay susamang mga insedente sa orange ug napun-an pa kini sa hulga sa mga rebelde ug uban pang pundok nga nagsige og panghulga nga nanginahanglan na nga lubgan sa mga pulis ug army, aron mapatunhay ang kalinaw.

Niadtong Enero, gipahimutang sa Comelec ang 38 sa 1,642 ka lugar ubos sa election areas of concern sa red category alang sa eleksyon sa Mayo.

Apan gipasabut sa Comelec nga kon kaniadto, ang ilang basehan ang sitwasyon sa lugar subay sa mga kagubot nga may kalambigitan sa eleksyon, apan karon, ang kahimtang sa labing duol nga tulo ka buwan mao nay giobasehan.

Kini usab ang hinungdan nga karon, gikan sa 177 ka lugar ubos sa orange category, 156 na lang.

Niini usab, 194 na lang ka lugar ang ubos sa yellow category, samtang ang upat ka lungsod sa Bohol nga nahibalik sa green, nalakip na sa 1,256 ka lugar nga gilibkas ang comelec area of concern. (PIABohol)