Mga mag-uuma, institutional buyers sa Bohol nakig-alayon

sa mga buyers atol sa B2B market matching engagement

TAGBILARAN CITY, Bohol (PIA)--Aron makonektar ug masumpay ang mga farmers' cooperatives and associations (FCA) sa mga market players ug institutional buyers, ang Department of Agriculture-Central Visayas (DA7), pinaagi sa Agribusiness and Marketing Assistance Division (AMAD) nagpahigayon og Business-to-Business (B2B) market matching engagement niadtong Hunyo 10, 2025, sa syudad sa Tagbilaran.

Si DA7 Executive Director Angel C. Enriquez, sa iyang mensahe, midasig sa mga mag-uuma sa pagpadayon sa pagpanguma, tungod kay aduna sila’y importante nga papel sa food security.

“You are all part of the dream to achieve food security in our country (Kamong tanan kabahin sa pangandoy nga makab-ot ang food recurity sa atong nasod). Kay ang food security dili lang ni trabaho sa DA, apan responsibilidad sa tanan. Food security is not only about production (Ang seguridad sa pagkaon dili lamang bahin sa produksiyon). Yes, dako gyud na siya’g papel, pero kinahanglan pud nato ang mga responsible consumers aron makab-ot kini nga tinguha,” matud pa ni Enriquez.

Gidugang pa niini nga ang mga mag-uuma mao gyud ang kauban sa DA ug katambayayong sa produksyon, ilabi na sa papel niini sa value chain approach.

“Magsugod gyud ta sa producers, which are the farmers, and kami sa DA, mo-suporta mi sa production. Pinaagi aning activity, atong masabtan unsa gyud ang mga panginahanglan sa atong mga consumers. Sa laing bahin, ang atong mga farmers makaila na sa mga institutional buyers, aron dili na sila maglisod og baligya sa ilang produkto,” dugang pa ni Enriquez.

Sa B2B, ang mga partisipante nga FCA gihatagan og higayon nga makig-interact ug makigsabot direkta sa mga concessionaires, hotel, restaurant, ug institutional buyers gikan sa probinsya sa Bohol, samtang nagbinayloay sila og importanteng impormasyon sama sa mga tipo sa produkto, espesipikasyon, presyo, ug kapasidad sa suplay.

Si SJ04 Joseneil S. Doroy sa Bureau of Jail Management and Penology-Tagbilaran City Jail, nga nagrepresentar sa ilang buhatan nipadayag og pasalamat sa inisyatiba, tungod kay nahatagan sila og kahigayonan nga direktang makiglambigit sa mga producers gikan sa probinsiya.

“Dako kaayo ko’g pasalamat nga naka-apil ko ani nga market matching sa DA kay dako gyud ni’g ikatabang sa among jail, ilabi na sa pagkaon. Ilabina sa mga gulay kay nangita mi’g barato nga supplier. Nakakita gyud ko’g supplier nga mohatag og very reasonable price per kilo sa gulay, unya nakasabot pud mi kung kanus-a magsugod ang among transactions,” matud pa ni Doroy.

Uban sa B2B, ang mga lokal nga mag-uuma ug mangingisda gihatagan og gahum tungod kay ilang mapalapdan ang ilang access sa merkado.

Nitambong usab sa B2B ang mga hotel, restaurant, ug mga ahensya sa gobyerno. Kini nga inisyatiba naghatag og gahum sa lokal nga mag-uuma pinaagi sa pagpalapad sa ilang akses sa merkado. (ECB/PIA7-Bohol)

Gipahigayon sa DA7 ang usa ka Business-to-Business (B2B) market matching engagement aron ikonektar ang mga mag-uuma sa Bohol ngadto sa mga market player ug institutional buyer niadtong Hunyo 10, 2025 sa syudad sa Tagbilaran. (hulagway sa DA7)