Kinder, mandatory na sa public schools  TAGBILARAN CITY, Bohol, Feb. 29 (PIA)--Aduna na usab kindergarten sa mga pampublikong tunghaan. Nagpasabot lamang kini nga ki­nahanglan unang mosulod sa kindergarten ang usa ka bata sa dili pa motungha sa grade 1. Kini human gilagdaan ni Presidente Benigno Aquino III ang "Kindergarten Education Act" o Republic Act 101-57. Gilagdaan kining maong balaod niadtong Pebrero 20. Gitakda sa maong balaod ang libreng usa ka tuig nga public kindergarten education alang sa mga batang adunay edad lima ka tuig gikan sa School Year 2012-2013. Matud pa sa Department of Education (DepEd), usa lamang ang kindergarten education act sa ilang giduso nga lakang aron mapalambo ang kalidad sa edukasyon sa nasud. Kumpiyansa usab ang DepEd nga pinaagi sa pagtungha sa kindergarten, maandam ang mga estudyante sa ilang pagtungtong sa grade school. (PIA-Bohol/ecb) ________________________________   Palasyo: Kakulang sa lawak-tunghaan masulbad na sa 2013   TAGBILARAN CITY, Bohol, Feb. 29 (PIA)--Kumpiyansa ang Malakanyang nga masulbad niini ang grabeng kakulang sa mga lawak-tunghaan sa tibuok nasud sa sunod tuig. Sa pag-atubang ni Presidente Benigno "Noynoy" Aquino III sa 4th National Congress of the Coordinating Council of Private Educational Associations (COCOPEA), miingon kini nga aduna nay mga gihikyad nga reporma ang kagamhanan sama sa Public Private Partnership (PPP) program nga gipatuman aron masulbad ang kakulang sa classrooms.  Matud pa sa Presidente nga sukad siya milingkod sa puwesto niadtong tuig 2010, daku na ang gikunhod sa kakulang sa lawak-tunghaan tungod kay base sa Department of Education (DepEd), mikabat sa 66,800 ang classroom shortage apan giingong hinay-hinay na kining  nakuhaan pinaagi sa pagtukod og 15,000 classrooms niadtong miaging tuig ug adunay nadugang pang 35,000 classsrooms karong tuig. Masaligon usab ang DepEd nga masolusyonan nila ang classroom gap sa tuig 2013. Matud pa sa Presidente, sa tuig 2013, adunay gipaabot pang 15,000 classrooms ang matukod ubos sa PPP program. (PIA-Bohol/ecb)