Pagpaayo sa guba nga rubber tracks

Sa CPG oval, lakip sa “maintenance”

Rey Anthony Chiu

TAGBILARAN CITY, Bohol, Pebrero 27, 2012, (PIA) -- Anaa pa sa “maintenance period” ug mahimong walay gasto ang lalawigan sa pagpaayo sa nataho nga pagkaguba sa rubber tracks sa Carlos P. Garcia Sports oval.

Kini ang gipasabot ni Provincial Administrator Alfonso Damalerio, nga nagdagwayg anaa pa sa warranty period ang mga maintenance activities ang gihimo sa team sa pagtubag sa gikatahong suliran.

Tungod niini, mahimong dili pa mogasto ang Kapitolyo sa pagpa-ayo sa mga parte sa rubberized tracks nga gikatahong miborot dala na sa dili maayo nga pagpahunob sa tubig sa Sports Complex.

Segun sa unang gikataho, minilyon ang gigasto sa Kapitolyo alang sa paglatad sa guma nga running tracks sa oval sa CPG Complex, apan nahimo kining kontrobersyal dala sa gipaningil nga entrance fees sa mogamit niini.

Labaw na nga natigaw ang hisgutanan dihang nakita nga may mga parte sa running tracks nga nanga-angkaw dala sa dili mayo nga drainage system, diin gi-alegar nga ang running tracks ubos pa sa gihabogon sa mga duwaanan, hinungdan nga dali kini malapawan sa tubig kon mo-uwan.

Niini, gipasabot usab ni Damalerio nga mapaabot usab nga may maintenance activities gayud nga himoon sa tracks tungod kay bantang kini sa init ug uwan.

Gipasalig usab sa Provincial Administrator nga may tukmang maintenance crew nga andam mag-ayo sa bisan unsang problema sa tracks sa CPG Complex.

Wala usab hinuon hisguti sa Administrador sa Kapitolyo unsa ang mahitabo kon mohupas na ang libre nga maintenance sa kontraktor nga naglatad sa rubber tracks.

Sa laing bahin, gibutyag usab ni Damalerio nga may dugang pang mga kabag-ohan nga mapa-abot ang CPG sports Complex.

Lakip sa iyang gilakbitan sa pagsaysay mao ang swimming pool ug ang dugang restroom nga tukoron aron dili na magkalisud ang mga tawo kon anaa sa sulod sa complex ug may tawag sa lawas. (30)

==========

Paagi sa paghipos sa basura

sa Korea, pa-ambit ni Chatto

Rey Anthony Chiu

TAGBILARAN CITY, Bohol, Pebrero 27, 2012, (PIA) – Partikular nga nakapa-interes sa bahan sa Bohol nga mibisita sa Korea ang ilang pamaagi sa paghipos sa basura.

Atul sa iyang senemanang programa sa Kita u gang Gobernador, si Chatto, kinsa nabati gihapon sa mga Bol-anon pinaagi sa kahimanan sa Skype, mibutyag sa ilang pagdayeg sa pamaagi sa Korea diin hugot ang pagsubay sa pagpihig sa basura gikan mismo sa mga balay.

Niini nga paagi, ang malabay ngadto sa ilang mga sanitary landfill kadto lamang mga dili na gayud kahimuslan, diin giplana og maayo nga dunay mga hungawanan aron may tukmang gih\nhawaan ang magkalata nga basura.

Matud niya, human matabuni ang mga residual nga basura nga gilabay sa mga landfill, tukoron sa ibabaw niini ang mga parke, ug mahimong mawala na ang timailhan nga kanhiay, usa kini ka landfill.

Gni, matud niya, kon ang Pilipinas may balaod batok sa pagsunog sa plastic, sa South Korea, sentralisado ang paghipos ug pagsunog niini.

Gipasabot ni Chatto nga samtang ang pagsunog sa plastic gidili sa Pilipinas, sa Korea, usa ka building ang dulngan sa mga plastic, diin kini sunogon human bubo-an sa mga kemikal aron pugngan ang mga makahilo nga aso gikan niini.

Ang natunaw nga mga plastic, ibaligya usab aron ibalik ug himoon nga lahi na pud nga material alang sa plastic.

Matud sa gobernador, ang mga pamaagi sa South Korea sa paghipos sa ilang mga basura nahimo nga pamaaging gitun-an sa pipila ka nasud sama sa China, Pilipinas ug pipila pa ka mga nasud nga usab, nahimong suliran ang pag-hipos sa ilang mga sagbot, ilabi na kadtong mga dili malata.

Wala man mo-aghat si Chatto nga sundon ang ehemplo sa South Korea, tataw kayo nga ang iyang pagpa-ambit aron maghatag og ideya sa mga Bol-anon unsay himoon sa mga basura nga karon padayong gilalisan sa mga lungsod sa Bohol.

Si Chatto, uban sa bahan sa mga Bol-anong buot magtuon alang sa natad sa agrikultura, edukasyon ug turismo, mi-duaw sa South Korea aron hipnoon ang mga kasabutan kabahin sa panagtambayayongay sa duha ka kagamhanan.

Kauban ni Chatto ang mga haligi sa mga institusyon sa agrikultura dinhi sama nila ni Dr. Elpedio Magante, presidente sa Bohol Island State University (BISU), Dr. Dioscoro Avergonzado (BISU-Bilar), Engr. Eugene Cahiles, kinsa Agricultural Promotion Center manager ug si Assistant Provincial Agriculturist Larry Pamugas.

Sa ilang pagtugpa sa Korea, mipadayon sila sa usa ka tigum sa ilang mga katumbas sa Korea didto sa tourist ug agriculture city sa Geongju, subay ni Chatto. (30)