Mga bag-ong graduates, angay magbinantayon - DOLE TAGBILARAN CITY, Bohol, Feb. 27 (PIA)--Gitambagan sa Department of Labor and Employment (DOLE) ang mga bag-ong graduates nga magbinantayon batok sa mga illegal recruiters ug placement agencies sa ilang pagpangita og trabaho.   Tambag sa DOLE sa mga gustong mangita og trabaho, mas maayo nga makisayud una sila sa ilang regional ug field offices sa DOLE alang sa listahan sa mga licensed private recruitment ug placement agencies sa dili pa mosugod sa pagpangita og trabaho.   Matud pa sa DOLE, kinahanglang alerto ug magbinantayon ang mga bag-ong graduates sa pagpangita og trabaho tungod kay kini ang gipaabot nga higayon sa mga illegal recuiters nga magamit sila sa pagpangilad.   Sa Executive Order No. 797, nahatagan og gahum ang DOLE aron i-regulate ug i-supervise ang pribadong sektor sa ilang partisipasyon sa recruitment ug placement sa mga mamumuo sa nasud.   Matud pa kang Baldoz sa usa ka radio interview, ma­kigtambayayong ang DOLE ug Public Employment Service Offices (PESO) sa mga jobseeker aron matumbok ang authenticity sa local recruitment agencies.   Gitin-aw usab ni Baldoz nga mahimong moduaw ang mga graduates sa mga job fairs, training, ug career counseling sa DOLE nga makatabang sa pagpangita nila og trabaho. Giingong dili angay magpadala o magpailad ang mga bag-ong graduates sa mga makadaning tanyag nga maule lamang sa pagpangilad kanila.   Adunay updated directory ang PESO offices sa Bureau of Local Employment website sa DOLE.  (PIA-Bohol/ecb) ___________________________   BFAR: Walay rason nga mosaka ang presyo sa isda karong Semana Santa   TAGBILARAN CITY, Bohol, Feb. 27 (PIA)--Walay rason ang mga tigpamaligya og isda aron mopasaka og presyo sa isda bisan magkadaku ang panginahanglan niini tungod kay dili man mokaon og karne ang mga Katoliko sa panahon sa Semana Santa.    Matud pa ni Bureau of Fisheries and Aquatic Resources (BFAR) Director Atty. Asis Perez, kampante sila nga mahimong moubos ang presyo sa mga isda sa mosunod nga buwan tungod kay dili man magkulang ang suplay niini sa mga kamerkaduhan.    Pasabot sa BFAR, magkadaghan na ang mga isdang makuha tungod kay pawala na ang hanging amihan ug kun mosulod na ang panahon sa ting-init, mas paspas nang modaku ang mga isda.    Dugang pa ni Perez, ilibkas na usab sa BFAR sa katapusan sa buwan ang fishing ban sa tamban sa Zamboanga Peninsula.    Kahinumdoman, kasamtangang gidili ang pagpangisda sa tamban niadtong Disyembre aron  pasagdan usa nga modaku o modaghan ang suplay niini. (PIA-Bohol/ecb)