Eco-tourism orientation gihimo sa Batuan

TAGBILARAN CITY, Bohol, Peb 23 (PIA) -- Ang mga tigtampo sa turismo (tourism stakeholders) sa lungsod sa Batuan, Bohol mipailawom sa usa ka ‘eco-tourism orientation’ niadtong Pebrero 20-21 nga gihimo didto sa Balay sa Humay.

Ang pagbansay-bansay gidumala sa Batuan Colleges inabagan sa Philippine Information Agency (PIA)-Bohol nga mituki sa mga bag-ong nahipno nga mga ecotourism sites ug destinations sa Bohol lakip na ang mga inputs sa katakus sa paggiya sa mga turista.

Kini gitambongan sa mga ‘community tour-guides’ sa lungsod sa Batuan, sa gibantog na nga suroyanang Shiphaus ug sa mga tour guides sa Makapiko River Adventure lakip na ang pool guides sa Balay sa Humay.

Gilauman sa pagbansaybansay nga kadugangan ang kahibalo ug katakus sa mga tour stakeholders sa pagdumala sa mga bisita nga mosuroy ug mutagamtam sa kaanindot sa Batuan.

Apil sa mga gisayran usab sa mga stakeholders mao ang mga hitabo nga nagtumod sa desisyon sa Bohol nga mamahimong prime-eco-tourism destination sa Visayas ug sa nasud.

Uban sa mga kasayoran mao ang mga gi-kaintapang suroyanan lakip na ang mga nagpadayon pa sa pag-ugmad nga suroyanan sa Batuan ug sa tibuok probinsiya saBohol.

Ang pagbansay-bansay nakuha sa Batuan Colleges gikan sa pundo sa Japan International Cooperation Agency human kini mipadala sa ilang propesor ngadto sa Japan aron magtuon sa bag-ong konseptong eco-tourism.

Matud sa mga mitambong hinay na nga natukas sa ilang galamhan ang konsepto nga eco-tourism ug ila na usab nga nasabtan nganong dili mohalin ang ilang tanyag nga suroyanan kon isakay sa standard nga Chocolate Hills tours.

Dili ang tanang turista dunay igo nga pagsabot sa bag-ong matang sa turismo nga milaum nga ang mga turista may makat-onan gikan sa kultura ug kinaiya sa mga katawhan, inay sa kasagarang suroy-tan-aw o sightseeing, matud nila. (mbcn/rahc/PIA-Bohol)

=========

Cebuano News: Kapitan sa Shiphaus mi-briefing sa mga bag-ong guides sa Batuan

By Rey Anthony H. Chiu

TAGBILARAN CITY, Bohol, Peb 27 (PIA) -- Mismo ang tag-iya sa gidugok na nga Shiphaus sa Batuan, Bohol ang mihimo sa espesyal nga briefing ug input sharing sa iyang gipanag-iya nga balay nga barko ngadto sa mga tourism stakeholders sa Batuan.

Daku ang kalipay ni Captain Gaudencio Dumapias nga gikauban ang mga local tour guides sa lungsod sa Batuan aron iyang ika-paambit ang mga detalye nga mahimong ikapangutana sa usa ka turista kabahin sa kinabuhi sakay sa usa ka barko.

Matud sa kapitan, kinsa nahomong master mariner sa panuigon nga 34 pa lamang, lisud ang iyang gi-agi-an gikan sa usa ka kabus nga estudyante, apan ang determinasyon sa pag-pamaayo sa iyang kinabuhi nahimo nga matuod human siya mitapos sa Philippine Merchant Marine Academy.

Gipaambit sa Kapitan ang kala-inan sa mga opisyal sa barko, sa rason nga ang Shiphaus duna usay mga kamarote alang sa Kapitan, Chief Mate, Chief Engineer ug sa mga yano nga tripolante.

Sa iyang briefing nga didto gayud gihimo sa officers mess hall sa iyang sikat na kaayo nga balay, si Kapitan Dumapias mibutyag nga tumong gayud niya nga dugangan pa ang mga butang sulod sa ship’s bridge aron masinati gayud sa mga turista ang mga kagamitan sulod sa pilot-house sama sa radar installation ig instrument consoles.

Didto sa bridge, may gimontar usab nga navigator’s wheel, apan tataw kayo nga ng shiphaus, wala mahalugar tungod nga ang makita sa mga samin niini, talan-awon man nga sarang igkita sa kamad-an, ug dili sa dagat.

Niini, gibutyag sa kapitan ang laraw nga tabunan ang mga salamin sa usa ka higanteng view screen diin ang mga talan-awon nga i-project, kadto gayud nga sarang igkita sa lawod.

Gawas sa mga tripolante nga nagsaoy-saoy sulod sa maong barko, tataw usab nga gimontar sa iyang viewdeck o sundeck ang mga life jackets ug live rings.

Kinanhanglang mpabati gayud ang natural nga bati-on kon ang usa ka tawo mosakay sa barko aron mas matinud-anon ang kasinatian.

Niini, iyang gipasabot sa mga tour guides nga ang iyang gipaambit nga mga inputs dako ug ikatabang aron ikapasabot ang kinabuhi sa barko, nga maoy tumong sa mga bisita. (mbcn/rahc/PIA-Bohol)