Gobyerno, milihok batok sa blast fishing TAGBILARAN CITY, Bohol, Mar. 01 (PIA)--Ang experimental o test blast fishing nga gihimo sa Bureau of Fisheries and Aquatic Resources (BFAR) didto sa lungsod sa Calape nagpakita lamang kun unsa ka daku ang kadaut nga mahimo niini sa mga isda. Si BFAR Director Atty. Asis Perez kauban ang ubang regional directors sa maong buhatan mipahigayon sa test blast fishing niadtong Biyernes, Pebrero 24 didto sa duha ka ektaryang fishpond sa BFAR-Central Visayas Regional Fisheries and Development Center sa lungsod sa Calape. Ang maong blast testing gibuligan sa Firearms and Explosive Division sa Regional Philippine National Police ug apil na usab sa local government units dinhi sa lalawigan sa Bohol. Ang resulta sa usa lamang ka pagpaboto sa dinamita sa fishpond nagpakita sa mga nangamatay nga isda nga nasulod sa gilay-on nga 65 metro gikan sa lugar nga gipabothan niini. Gi-banabana sa BFAR nga ang kantidad sa kadaut sa mga isda lamang sa usa ka pagpaboto sa dinamita mokabat ngadto sa P24,000.00, apan ang nihimo sa maong matang sa pangisda makakuha lamang og P800.00 gikan sa makuha niining hangtud sa 10 ka kilo nga gibaligya lamang sa P80.00 matag kilo. Tungod niini, nanawagan ang BFAR sa katawhan ug ang panginahanglan sa hingpit nga pag-abag sa mga lokal nga kagamhanan aron masumpo kining matang sa pagpangisda tungod sa daku nga kadaut nga dala niini sa mga isda ug uban pang bahandi sa dagat. (PIA-Bohol/ecb) _____________________ DILG-Bohol miila sa 13 ka mga disaster-prone nga lungsod TAGBILARAN CITY, Bohol, Mar. 01 (PIA)--Gitino sa Department of Interior and Local Government-Bohol (DILG-Bohol) ang mga lungsod sa Anda, Balilihan, Batuan, Clarin, Inabanga, Jagna, Loboc, Loon, Sierra-Bullones, San Miguel, President Carlos P. Garcia, Ubay ug Talibon isip mga disaster-prone nga mga lungsod. Sa maong 13 ka mga lungsod, ang lungsod sa Jagna lamang ang adunay quick response system nga gitawag nila og Jagna Emergency Rescue Unit (JEMRU). Matud pa ni DILG Provincial Director Ma. Louisella Lucino, ang lungsod sa Jagna lamang ang nakamugna og 24-hour quick response center nga gisundog nila sa Tarsier 117 (Telephone and Radio System Integrated Emergency Response) sa probinsiyal nga kagamhanan. Dugang pa ni Lucino nga ang disaster risk reduction committees ngadto sa barangay level sa lalawigan sa Bohol naghimo pa karon sa ilang inventory sa mga lugar ug pamilya nga kuyaw maigo kun adunay katalagman isip pagsunod sa mando sa DILG-national ngadto sa mga provincial offices sa pagmugna og statistics. (PIA-Bohol/ecb)