Smart-PIA Infoboard gilusad Sa Central Visayas

By Rey Anthony H. Chiu

CEBU CITY, Marso 2 (PIA) –Mahimo na nga ang imong gihuptang cellphone nga migamit sa SMART carrier makadawat sa mga disaster alerts ug weather bulletin, lakip na sa mga importanteng pahibalo.

Kini human gilusad alang sa pagpalapad sa programa sa pagpakatap sa kasayuran sa kabisay-an ang Smart Infoboard niadtong Marso 1, didto sa Philippine Information Agency sa Sugbo. 

Matud pa ni PIA-7 regional director Minerva Newman, ang Infoboard usa ka pamaagi diin anng mga cellphone sa mga subscriber nga libreng magparehistro alang sa serbisyo, makadawat sa libre nga pahibalo gikan sa kagamhanan matag adlaw. 

Sa usa ka paagi, ang mensahe nga kanhi gipadala sa kagamhanan nga ginamit ang mga personal nga cellphone numbers, adto na magsubay sa usa ka sentral nga numero nga I-assign sa SMART, ug ang mga subscribers nga motugot sa pagdawat sa mga mensahe, libre nga makadawat niini. 

Ang PIA nakigtambayayong sa SMART Communications alang sa pagpadangat sa mga mahinungdanong kasayuran kabahin sa dagan sa panahon, pagpangandam alang sa katalagman ug mga mahinungdanong mensahe nga kinahangalng mahibaw-an sa katawhan, matud ni Newman. 

Segun sa pagpasabot sa mga tinugyanan sa Smart, ang usa ka cellphone user nga buot modawat sa libre nga mga pahibalo kinahanglang marehistro sa libre nga mga pahibalo, pinaagi sa PIA. 

Niini, kapugngan na usab ang tinonto nga paggamit sa ubang mga tawo sa text messaging aron lamang manghadlok, tungod ang mga mensahe nga ipadangat sa InfoBoard dunay tataw nga numero nga naka-assign. 

Ang paglusad gitambongan sa mga information officers sa Bohol, Cebu ug Negros Oriental nga sakop sa Regional Association of Development Information Officers lakip na usab ang mga information officers sa National government Agencies ug local governments. (mbcn/rahc/PIA-Bohol) 

=========

Dul-an sa P10M naabo Sa sunog sa 2 buwan

By Rey Anthony H. Chiu

TAGBILARAN CITY, Bohol, Marso 2, (PIA) – Misulod ang Buwan sa Pagpugong sa Sunog ning tuig 2012 nga may natala na nga dul-an sa P10 milyones nga kabtangang nanga-abo ug 15 ka mga insidente sa sunog. 

Dungan sa hugtanon nga pag-aghat sa pagmatngon aron kalikayan ang sunog, si Bohol Fire Marshal Pepe Rebusa mipadayag sa tema sa paghandum sa buwan sa paglikay sunog.

“Makiisa at makipagtulongan upang sunog ay maiiwasan,” matud niya, maoy usa ka aghat sa pagtinabangay dala sa tataw nga wala pa makab-ot nga tumong sa pagpugong sa sunog. 

Importante nga makighiusa kita aron tabangan ang pagpangandam, pagpakatap sa kasayuran sa pagsugod sa sunog, pagtabang sa pagpawong niini ug sa pagaghat sa mga local nga kagamhanan sa paghipno sa mga ekipo nga gikinahanglan niini, matud ni Rebusa. 

Segun sa datos nga gipaambit sa local nga buhatan sa bombero sa Bohol, 21 lamang ka lungsod ang nakabaton og firetruck, samtang ang sunog nagpabiling usa sa mga labing gikahadlokang katalagman. 

Bisan ang yano nga banay mahimo nga makatabang aron ang panimalay makahimo og tukmang pagpangandam sa paglikay sunog. 

Kon ang mga sakop sa panimalay dunay kaugalingong mga assignments batok sa sunog, daghang kabtangan ang maluwas. 

Gipasabot ni Rebusa ang simple nga pag-ibog sa saksak sa mga appliances sa dili pa matulog usa ka maayo nga batasan.

Gisumpay sa labawng bombero nga ang appliances, bisan wala mag-andar apan nagpabilin sa iyang gisaksakan nga outlet, migamit gihapon sa korente nga mahimong hinungdan na hinuon sa overheating.

57 sa mga hitabong sunog sa milabayng duha ka tuig nagsugod sa mga appliances nga wala ma-tangtang, faulty electrical wiring ug mga disgrasya nga may kalabut sa sayop nga paggamit sa koryente. (mbcn/rahc/PIA-Bohol)