NDRRMC, nipasaka na sa blue alert status alang sa summer; nipasidaan batok sa heat stroke TAGBILARAN CITY, Bohol, Mar. 05 (PIA)--Gisaka na sa National Disaster Risk Reduction and Management Council (NDRRMC) ang blue alert status karong opisyal nang misulod ang summer. Matud pa ni NDRRMC Executive Director Benito Ramos, kini gituyo aron mahimong andam  ang ilang buhatan sa mga mahimong mahitabo tungod sa grabeng kainit sa panahon ilabi na nga daghan ang mobakasyon sa mga probinsiya. Nipasidaan ang NDRRMC sa publiko nga dili magbuwad sa adlaw, kanunay nga moinom og tubig ug kun mobakasyon, magdala og mga pangproteksyon sa grabeng kainit aron malikayan ang heat stroke. Gipaandam na usab sa NDRRMC ang publiko sa Semana Santa aron sa luwas nga pagbyahe ug pagbakasyon. Usa ka semana sa dili pa ang Semana Santa, ipasaka usab sa NDRRMC ang red alert status. Samtang nipagawas na usab og advisory ang buhatan sa Department of Agriculture (DA) sa mga angay  itanom sa mga mag-uuma karong panahon sa ting-init. (PIA-Bohol/ecb) ____________________________ CHED, tun-an pa ang petisyon sa tuition hike   TAGBILARAN CITY, Bohol, Mar. 05 (PIA)--Repasohon o tun-an pa sa Commission on Higher Education (CHED) ang petisyon sa may 300 ka kolehiyo ug unibersidad alang sa pagpasaka og tuition. Kini taliwala sa hangyo sa pamonuan sa 300 ka universities ug colleges nga kinahanglan  nilang mopasaka og tuition sa school year 2012-2013 aron makasagubang tungod na usab sa padayong pagsaka sa mga panaliton ug pagsaka sa mga produktong petrolyo. Gipasabot ni Deputy Presidential Spokesperson Abigail nga gitugotan sa balaod nga makapasaka og mga bayronon ang mga tunghaan matag tuig basta nahiuyon kini sa gipatuman nga limit. Matud pa ni Valte nga walay control ang gobyerno niini tungod kay kinahanglan lamang ang konsultasyon sa mga tinun-an, alumni ug faculty sa dili tugotan ang hangyo nga tuition hike sa usa ka tunghaan. Gipahayag usab ni Valte nga gikan sa 2000 ka higher education institutions, 300 lang ang ni-apply og permiso nga mopasaka og tuition. Giingong dili pa pinal ang pagpasaka og tuition hangtud walay permit nga ipagawas ang CHED. (PIA-Bohol/ecb)