Pagpasarado sa ubang embahada, gidepensahan sa Malacañang TAGBILARAN CITY, Bohol, Mar. 06 (PIA)--Gidepensahan karon sa Malacañang ang pagpasarado sa ubang embahada sa Pilipinas sa nagkalain-laing nasud.   Una nang gikumpirmar sa Department of Foreign Affairs (DFA) ang gibanabanang 10 ka embahada ug konsulada sa Pilipinas nga ipasarado aron makadaginot ang gobyerno.   Apil niini ang mga embahada sa Saipan, Romania, Stockholm sa Sweden, Frankfurt sa Germany, Barcelona sa Spain ug Palau.   Matud pa ni Deputy Presidential Spokesperson Abigail Valte nga magbutang ang DFA og mga honorary consuls sa mga apketadong nasud aron maoy daganan sa mga OFWs.   Gipasabot ni Valte nga i-divert ang pondong matigom sa mas dagkung embahada diin  nagtrabaho ang mas daghang OFWs.   Bisan pa niini, giingong makalaum gihapon ang mga OFWs nga dili sila pasagdan sa gobyerno sa ilang mga concern.   Una nang gisupak sa mga OFWs kining maong lakang sa administrasyon tungod kay giingong naglisod naman gani sila bisan adunay konsulada o embahada mao nga siguradong mas maglisod pa sila kun madayon ang pagpasarado. (PIA-Bohol/ecb) ____________________________   Walay rason aron magkudeta ang mga sundalo – Palasyo   TAGBILARAN CITY, Bohol, Mar. 06 (PIA)--Kumpiyansa ang Malacañang nga dili magmalampuson ang mga nang-recruit sa mga sundalo sa pagbatok sa administrasyong Aquino.   Kahinumdoman nga gikumpirmar ni Sen.  Antonio Trillianes nga adunay nagtinguhang  pagdani sa mga sundalo nga moapil sa planong pagpalagpot sa puwesto kang Presidente Benigno "Noynoy"  Aquino.   Matud pa karong buntag ni Deputy Presidential Spokesperson Abigail Valte nga walay rason aron magkudeta ang mga sundalo human masugdi ang mga reporma sa ilang bahan.   Sigun pa kang Valte, natagamtam na sa militar ang resulta sa maong kausaban sama sa  mas bag-ong kagamitan, pagpa-usbaw sa combat pay ug housing alang sa mga sundalo.   Gipahayag ni Valte nga walay impormasyon ang Armed Forces of the Philippines (AFP) sa pahayag ni Trillianes ug nagpabiling propesyunal ug nagsunod sa chain of command ang mga sundalo.   Matud pa sa AFP nga wala sila'y nakuhang impormasyon apan padayon ang ilang pagbantay batok sa posibilidad nga hulga sa kalinaw. Nagtuo usab ang Palasyo nga nagpabiling  propesyunal nga organisasyon ang AFP ug padayong mosunod sa chain of command. (PIA-Bohol/ecb)