Bag-ong PH slogan, pormal nang gilusad sa tibuok kalibotan TAGBILARAN CITY, Bohol, Mar. 08 (PIA)--Pormal nang gilusad gahapon sa Department of Tourism (DOT) sa tibuok kalibotan ang bag-ong tourism slogan sa nasud nga "It's more fun in the Philippines".   Gipangulohan ni Tourism Secretary Ramon Jimenez ang paghikyad sa slogan sa Annual International Tourism Congress nga gipahigayon karon didto sa Berlin, Germany.   Matud pa ni Jimenez nga mahinungdanon ang pag-rollout sa kalibotan sa maong bag-ong slogan aron makadani og daghang turista nga mobisita sa nasud.   Ang Annual International Tourism Congress nga molungtad og lima ka adlaw gikan Marso 7 hangtud Marso 11, ang labing dakung tourism trade show sa kalibotan nga giapilan sa mga international tourism offices, travel related companies ug tourist oriented service providers. (PIA-Bohol/ecb) _______________________________________   Bag-ong buwis, di pa kinahanglan – Palasyo   TAGBILARAN CITY, Bohol, Mar. 08 (PIA)--Giseguro og balik sa Malakanyang nga dili magpatuman og bag-ong buwis ang gobyerno.    Matud pa ni Presidential Spokesperson Edwin Lacierda nga tutokan na lamang nila ug hingusgan pa ang tax collection.    Una nang miingon ang International Montetary Fund (IMF) nga angay magpatuman og bag-ong buwis ang gobyerno aron matubag niini ang medium-term growth.   Apan pasabot ni Lacierda, giduso na sa kongreso ang sin taxes bill ug rationalization sa fiscal incentives nga magpaayo sa pagpangolekta og buwis.    Giingong sa buwis pa lamang nga ipatong sa mga sigarilyo ug bino, gipaabot na nilang mokita ang gobyerno og P60 bilyon nga ibutang usab sa Universal Health Care Program sa administrasyong Aquino. (PIA-Bohol/ecb)