Sugyot nga kaltasan ang VAT sa petrolyo, gibasura sa Malacañang TAGBILARAN CITY, Bohol, Mar. 09 (PIA)--Gibasura sa Malakanyang ang sugyot ni kanhi  Budget Secretary ug University of the Philippines (UP) Economics Professor Benjamin Diokno nga kaltasan ang 12 percent value-added tax (VAT) sa mga produktong petrolyo.   Matud pa ni Deputy Presidential Spokesperson Abigail Valte nga dili mahimong hilabtan ang gipatuman nga buwis karon sa lana tungod kay naggikan dinhi ang pondo sa gobyerno alang sa mga proyekto nga nagtinguhang mapa-uswag ang kinabuhi sa mga kabus.   Gipasabot ni Valte nga bisan gusto sa administrasyong Aquino nga tabangan usab ang ubang naapetuhan sa padayon nga pagsaka sa presyo sa petrolyo, mas prayoridad niini ang mga sektor nga mas nanginahanglan og tabang.   Una nang gisugyot ni Diokno nga kaltasan ang VAT sa petrolyo diin mikabat na sa $120 matag bariles ang presyo sa krudo, apan ipasaka gihapon ang presyo kun moubos sa $80 ang matag bariles niini.   Adunay VAT sa diesel, kerosene ug LPG apan wala kini excise tax. (PIA-Bohol/ecb) __________________________________   6 ka Pinoy nasulod sa Forbes' global billionaires list   TAGBILARAN CITY, Bohol, Mar. 09 (PIA)--Unom ka Pinoy tycoons ang naapil sa listahan sa pinaka-adunahang tawo sa tibuok kalibotan.   Gibutyag sa Forbes Magazine nga labing adunahang Pinoy ang mall tycoon nga si Henry Sy.    Naa sa ika-111 nga pwesto si Sy ug ang iyang pamilya nga nakatala og $8 bilyong net worth.    Naa sa ikaduhang pwesto usab si Lucio Tan nga nanag-iya sa 1/3 sa Philip-Morris Fortune Tobacco ug Philippine Airlines.   Nasulod usab sa listahan sa Forbes sila Andrew Tan sa Alliance Global nga may business interest usab sa Megaworld Corporation, Emperador Distillers, ug Resorts World Manila ug Enrique Razon Jr. nga naa sa Ports Operation.   Samtang bag-ong nasulod sa listahan ang mga negosyanteng sila Eduardo Cojuangco sa San Miguel Corporation ug Roberto Ongpin nga adunay investments sa property, gaming, mining, ug telecommunications. (PIA-Bohol/ecb)  ________________________________ Bohol, nakadawat og Outstanding Phil. Organic Agriculturist Award   TAGBILARAN CITY, Bohol, Mar. 09 (PIA)--Nag-una ang lalawigan sa Bohol sa gitawag nga 2011 Nationwide Search for Outstanding Philippines Organic Agriculturist Award sa kategorya nga local government unit (LGU).   Mao kini ang gibutyag ni Gobernador Edgar M. Chatto kagahapon atol sa ika-10 nga HEAT-Bohol Caravan nga gipahigayon didto sa lungsod sa San Miguel.   Ang maong pasidungog nagtinguha sa pagtabang sa kagamhanan sa mga polisiya niini kabahin sa paggamit og mga organic agriculture pinaagi sa pakigtambayayong sa pribadong sektor, sa Department of Agriculture (DA) ug sa iyang mga ahensiya ug Agri Aqua Network International Inc.   Ang maong proyekto gitinguha usab nga maoy mamahimong usa ka maayong ehemplo sa PPP, OIC, ug OPA sa pagtinabangay.   Si Provincial Agriculturist Larry Pamugas sa Provincial Agriculture Office ug ang Socio-Economic and Environment Management (SEEM) Cluster Head nga si Liza Quirog maoy midawat kagahapon sa maong pasidungog didto sa Commission Officer's Clubhouse sa Camp Aquinaldo, Quezon City sa ngalan ni Gob. Chatto, kinsa maoy nag-preside usab sa Provincial Peace and Order Council (PPOC) meeting kagahapon didto sa lungsod sa San Miguel. (PIA-Bohol/ecb)     ________________________________ TWG nga motuon sa Jevenile Justice System, gi-umol   TAGBILARAN CITY, Bohol, Mar. 09 (PIA)--Gitahasan sa mga sakop sa Provincial Peace and Order Council (PPOC) sa Bohol si 2nd District Board Member Godofreda Tirol nga maoy manguna sa gi-umol nga Technical Working Group nga mohimo og pagtuon sa Republic Act 9344 o ang balaod sa Juvenile Justice System nga maoy gitumbok nga hinungdan sa nagkadaghang mga menor de edad karon nga nalambigit sa nagkalin-laing mga krimen.   Si Gobernador Edgar M. Chatto nga maoy nanguna sa PPOC sa Bohol ug ang mga sakop niini nakahukom sa pagtuon sa maong balaod human gisugyot ni Bohol Police Provincial Office Director Constantino Barot Jr. ang pagpatukod og Youth Center alang sa mga menor de edad nga makalapas sa balaod.   Base sa taho nga gipadangat ni Barot atubangan sa mga sakop sa PPOC nga nagpabiling mikasaka karon ang mga nahitabo nga kawat ug kasagaran sa mga nalambigit, puros mga menor de edad.   Apil usab sa gisugyot ni Barot ang pagpanghatag og 'rewards system' alang sa mga makatudlo sa mga nakalapas sa balaod  ug ingon man usab ang E-blotter system alang sa dali nga pagtan-aw sa mga police blotter gikan sa mga istasyonan sa kapolisan. (PIA-Bohol/ecb)