Dugang P1K sa uniform allowance sa mga kawani sa gobyerno TAGBILARAN CITY, Bohol, Mar. 12 (PIA)--Gikumpirmar kagahapon sa Malacañang ang umento o dugang nga usa ka libo sa Uniform o Clothing Allowance (U/CA) sa mga kawani sa gobyerno.   Matud pa ni Deputy Presi­dential Spokesperson Abigail Valte, gikan sa kasamtangang P4,000 U/CA nga tigdawat sa mga kawani, mahimo na kining P5,000.   "Good news naman po galing sa Department of Budget and Management (DBM) na nadagdagan, nagkaroon po ng umento doon sa clothing allowance ng mga kawani po ng gobyerno na dati po 4,000 ay ngayon naiakyat na po sa 5,000 pesos," matud pa ni Valte.   Una nang gipahayag ni Budget Sec. Florencio Abad nga ang umento sa U/CA sa mga kawani sa gobyerno apil na usab sa gisaad sa kagamhanan nga mahatagan og igong  financial support ang mga public servants sa nasud. (PIA-Bohol/ecb) ______________________________   DOLE nipasidaan batok sa mga abusadong sub-contractor   TAGBILARAN CITY, Bohol, Mar. 12 (PIA)--Nipasidaan ang Department of Labor and Employment (DOLE) sa mga abusong ahensya o sub-contractors nga mahimo silang mawagtangan og negosyo kun mapamatud-ang nakalapas sila sa Department Order 18-A o ang kamanduan nga nag-garantiya sa proteksyon sa mga contractual worker.   Gipatuman ang maong kamanduan niadtong Nobyembre 2011 ug gilauman sa DOLE nga gisunod kini sa mga ahensiya.   Base sa probisyon sa kamanduan, gi-dili na ang pagbalik-balik nga pag-hire sa usa ka  trabahante tungod kay katungod niini ang pagbaton og security of tenure.    Matud pa ni DOLE Secretary Rosalinda Baldoz, usa sa mga probisyon sa maong department order ang pagbawal sa 5-5-5 o five-month, five-month duration ug "endo" o end of contract.   Giingong nakalatid kini sa seksyon 7 sa kamanduan tungod kay paglapas kini sa Article 280 sa Labor Code.    Samtang gitambagan usab sa DOLE ang mga contractual worker nga dili mahadlok ug isumbong dayon sa pinakaduol nga registration office sa DOLE kun makakita sila og mga pagpanglapas sa ilang mga ahensiya.   Sa gihimong pag-inspeksyon sa DOLE, mikabat na sa halos 1,500 ang mga sub-contractor sa industriya sa construction ang misupak sa balaod samtang ang mga sub-contractor sa sektor sa seguridad nga misupak sa balaod mikabat sa halos 2,000 na. (PIA-Bohol/ecb)