DENR nagpadayon sa systematic 

Adjudication pagpatitulo sa yuta 

Rey Anthony Chiu 

TAGBILARAN CITY, Bohol, Marso 18, 2012, (PIA) –Padayon ang systematic adjudication ilabi na sa napulo ka lungsod sa Bohol nga wala makaapil sa mga proyektong nagpanghatag og titulo sa mga yuta sa milabayng mga buwan. 

Butyag ni Glicerita Racho sa local nga buhatan sa Department of Environment and Natural Resources (DENR) nga wala usab maka-apil ang katapusang napulo ka lungsod sa Land Administration Management Project 1 ug 2, ug sa Local Government Unit-led Land Titling project, hinungdan nga sa pagkatibawas sa mga proyekto, ginagmay na lang nga pagpanghatag sa titulo ang mahitabo sa mga tag-iyahan sa mga parsela sulod sa mga lungsod. 

Kahinumduman nga 27 ka lungsod ang unang napailawom sa LAMP project sa DENR samtang laing 10 ka lungsod ang mipili sa LGU-led Land Titling. 

Niini, ang DENR matud pa, nagtutok na sa systematic adjudication nga mahitabo sa mga tag-iyahag yuta sa Baclayon, Valencia, Panglao, Dauis, Sevilla, Loboc, Bilar, Carmen, Dagohoy ug Danao. 

Tungod sa kahasul nga ikatanyag sa pagkuha og titulo ilabi na kong magtagsa-tagsa og palusot ang mga tag-iahag yuta sa lungsod, gisugyot sa DENR ngadto sa mga mayor nga nagkatigum sa League of Municipalities of the Philippines (LMP) didto sa JJs Marso 15, sa pagsagop sa LGU-led Land Titling aron makatabang sa mga nanginahanglan. 

Gawas pa, matud ni PENRO Nestor Canda, ang pagtanyag sa mga titulo sa yuta makapa-dako sa buhis nga makolekta sa lungsod sa propyedad real kay ang tawo mobuhis na man kon tataw na nga sa iyaha napangalan ang yuta. 

Ikaduha, kon mapasulod sa lungsod ang hiniusang pagpatitulo, mag daghang kagubot ang masolbad tungod ka yang nag-unang cadastral survey mao may magtumbok sa opisyal nga mga utlanan sa yuta hinungdan nga kapugngan na ang mga buroka. 

Tungod usab niini, sila si Racho ug Canda miaghat sa mga mayor sa pagtukod sa mga buhatan sa Land Information Office sa ilang lungsod, paghimo sa pagpahat alang sa suholan sa mga empleyado nga molihok sa mga papales ug sa pagtukod sa konseho nga magpadagan sa programa. 

Kon matuman na kini, ang DENR andam sa pagtibawas sa mga panginahanglanon sama sa pagbansay sa mga tawo aron masayud sa gimbuhaton sa proseso sa pagpatiotulo sa yuta. (30)  

==========

Pagpangandam alang sa TBTK 

Nagsugod na, journal gilaraw 

Rey Anthony Chiu 

CORTES, Bohol, Marso 18, 2012, (PIA) –Nagsugod na ang halapad nga pagpangandam alang sa nagsingabot nga Tigum Bol-anon sa Tibuok Kalibutan (TBTK) nga mahinabo sa Mayor 8-18 ning tuig. 

Magkatapok kausa sa duha ka tuig, ang TBTK nahimo na usab nga talagsaong higayon sa mga taga Bohol kinsa nahimong mga malampusong molupyo sa ilang tagsa-tagsa ka lugar gipamuy-an. nga makauli. 

Niini, gilantaw usab nga ang mga malampusong Bol-anon sa gawas sa nasud makatabang sa mga Bol-anong karon gihulga gihapon sa kawad-on. 

Agi ug dugang handumanan sa TBTK ning tuig, gipadayag ni Bohol First lady Pureza Chatto ang laraw sa TBTK Journal nga i-ubay sa TBTK. 

Si Pureza, kinsa mituyo og tambong sa labing bag-ong tigum sa mga mayor sa Bohol nga nasakop sa League of Municipalities of the Philippines (LMP) mibugtaw sa awhag aron himoong mas bibo ug mas mahinumduman ang TBTK 2012. 

Ang TBTK mga himoon sugod sa Mayor 8-18 ning tuig, unang gisugyot aron hatagag higayon ang mga Bol-anong may mga maayong kahimtang sa gawas sa nasud sa pag-uli. 

Kini aron ikabagat og usab ang ilang mga kabanay, kauban sa pagtungha kaniadto ug ikapakita kanila ang mga kabag-ohan sa Bohol ilabi na aron sila aghaton sa pagpamuhunan. 

Napabarug sa panahon ni Gob. Rene Relampagos, ang TBTK gihimo nga usa ka pagpa-uli sa mga aranag-arangan nga taga Bohol aron mapakita sa unsay proyekto sa lalawigan ang natumbok nga kapunduhan alang sa negosyo. 

Tungod niini, usa ka dili ika-hiklin nga kalihukan sa TBTK mao ang investment forum diin ang mga taga Bohol nga may kaya na, makakita sa unsay angayan nilang negosyo nga punduhan. 

Gawas sa investment foirum, ang TBTK magpahigayon usab sa re-unions ug get-together sa mga kahigalaan diin ang Bohol mangandam usab. 

Aron mas mahimong mahinungdanon ang TBTK, si Mrs. Chatto naga-awhag sa mga mayor sa kalungsuran sa pag-pasibya sa ilang mga nag-unag lugar sa turismo didto sa TBTK Journal nga gilaraw. 

Mahimong i-adverstise sa mga LGUS ang ilang mga kasamtangang tourist spots, produkto ug kadtong mga lugar sa ilang kalungsuran nga angayan kapunduhan alang sa dugang pag-ugmad niini subay sa industriyang turismo. 

Gipasabot usab ni Chatto nga ang kwarta nga matigum gikan sa journal maoy isipong pundo alang sa Bohol Crisis Intervention center, gawas pa sa pagplastar sa kampanya og promosyon sa local nga mga lugar pangturismo.

============

Mga tanod may ika-uban 

Na nga Pulis sa Barangay 

Rey Anthony Chiu 

TAGBILARAN CITY, Bohol, Marso 17, 2012 (PIA) -- Ilusad sa kapolisan sa Bohol ang proyektong Pulis Sa Barangay (PSB) ning pipila ka adlaw. 

Matud ni PSSupt Constantino Barot, ang PSB usa sa mga prayoridad nga proyekto ni Chief Philippine National Police Nicanor Bartolome aron kahatagan ug direktang superbisyon ang mga Barangay Peace-keeping officers o mas nailhang mga barangay tanod. 

Ang PSB magtudlo sa pulis gikan sa estasyonan nga maoy direktang superbisor sa mga tanod ug mga tawo nga naglihok alang sa kahusay ug kalinaw sa barangay. 

Ang presensya sa PSB dako na kaayo ug ikatabang aron mapaugmad ang kahusay ug kalinaw pinaagi sa gi-paabot nga pagkunhod sa krimen, tungod sa dugang nga presensya sa pulis, matud sa usa ka mayor atul sa tigum sa LMP Bohol. 

Kahinumduman nga walay ikasukol ang mga barangay tanod batol sa armandong mga criminal kay batuta lang ang ilang bitbit. 

Sa presensya sa pulis, mas dako na ang posibilidad nga mapataas ang kapasidad sa pagpugong sa krimen tungod kay may patas na nga tsansa ang tanod sa pagpanalipod sa ilang barangay batok sa mga criminal. 

Pasabot ni Barot, hangtud karon, wala pa gihapon tugoti ang mga tanod sa paggunit sa armas batok sa mga criminal. 

Pinaagi sa “Pulis sa Barangay,” ang pulis nga matumbok sa usa ka lugar mamahimong hepe sa mga tanod nga magsubay usab sa responsibilidad sa tinuod nga pulis, apan sa ginagmay nga paagi sa presinto sa barangay. 

Pangunahan sa pulis ang pagmandu sa usa ka presinto samtang mag-superbisar sa mga barangay tanod batok sa krimen. 

Lakip sa mga gimbuhaton sa PSB ang pagplano sa pagresponde ug patrolya, pagsubmitor sa mga taho ngadto sa hepe, paghipos sa mga kasayuran ug paghimog mga proyektong makapalig-on sa katalian sa pulis ug kumunidad. 

Dugang pa, ang PSB magpakanaug sa katakus sa pag-analisar sa local crime statistics isip basehanan alang sa tukmang aksyon aron dumalahon ang kahusay ug kalinaw sa barangay. (30) 

============

Chatto mibutyag sa CCTVs 

Nga giladlad sa Tagbilaran 

Rey Anthony Chiu 

TAGBILARAN CITY, Bohol, Marso 17, 2012, (PIA) – Dili na ka kompyansahan sa mga criminal ang paghimo og salaud sa Tagbilaran. 

Kini maoy pahimangno ni Gob. Edgar Chatto, kinsa mipadayag sa mga labing ulahing kabag-ohan sa paglatad sa teknolohiya alang sa seguridad sa Bohol. 

Matud ni Chatto, uban sa laraw sa pagpasumpay sa tanang mga estasyon sa kapolisan sa pasilidad sa internet, may gipangmontar usab sa mga kadalanan sa Tagbilaran nga mga closed circuit television cameras (CCTV) nga nagmonitor sa mga hitabo dinhi. 

Matud sa gobernador, dako og ikatabang ang mga dugang bantay sa kadalanan ilabi na kay tataw nga kuwang ang kapolisan sa Bohol sa pagbantay sa kahusay ug kalinaw. 

Sa iyang pagtaho sa mga sakop sa Provincial Peace and Order Council (PPOC) sa labing ulahing tigum niini, gibutyag ni Chatto nga padayon nga gipalapad sa Bohol ang kapasidad niini sa pagbantay batok sa mga krimen pinaagi sa pagladlad sa mga security cameras ilabi na sa mga entry ug exit points sa Tagbilaran. 

Kini human usab malukop ang CPG Sports Complex ug ang Bohol Cultural Center sa mga security cameras. 

Matud ni Chatto, ang mga camera nga gi-install sa mga strategic nga dapit sa syudad gisumpay sa usa ka wa itumbok nga server diin gimonitor ang mga hitabo 24 oras. 

Bisan pa kon sinugdanan pa kini, misumpay usab si PSSupt Constantino Barot nga kon mahiusa ang mga pribadong sector sa pagpahimutang sa ila usab nga mga security cameras, mahimo kining isumpay sa server aron wala nay kalustang agi-anan ang mga criminal. 

Gipadayag usab sa gobernador nga subay sa laraw sa kapolisan nga ipahimutang sa Bohol ang hiniusang online blotter, warrant ug rogues gallery, manduan ni Chatto ang Bohol Information Communication Technology Unit sa Kapitolyo sa pagpangitag paagi nga mahiusa ang tanang mga kasayurang gipasubay sa internet. 

Partikular sa tumong ni Chatto nga isumpay sa online information network ang mga mga estasyon sa kapolisan nga wala pay kasaligang landline pinaagi sa wireless systems. (30)