Phl, mosalmot sa Earth Hour sa Marso 31

TAGBILARAN CITY, Bohol, Mar. 19 (PIA)--Mosalmot na usab ang Pilipinas sa global community sa pagsaulog sa Earth Hour sa Marso 31, diin ang mga syudad ug kalungsoran sa tibuok kalibotan mamalong og suga gikan 8:30 hangtud 9:30 sa gabii aron pagpadala sa makusganong aksyon batok sa global warming.

Dinhi sa Pilipinas, tulo ka simultaneous Earth Hour switch-off ceremonies ang ipahigayon sa mga dagkung syudad dinhi. Ipahigayon kini sa mga syudad sa Makati (Ayala Tower), Cebu (Ayala Plaza) ug Davao (Ayala Abreeza).

Ang Earth Hour usa ka global event nga gi-organisa sa World Wildlife Fund Philippines (WWFF) nga ginahimo matag tuig sa katapusang Sabado sa Marso.

Kining maong kalihokan nga mi-sentro sa tema nga "I Will If You Will," nanawagan sa tanang panimalay ug mga negosyo nga mamalong og suga sa usa ka oras aron pagpakatap sa kasayuran ug pagpakabana kalabot sa climate change. (PIA-Bohol/ecb)

_________________________________

Update sa benefit claims sa SSS members, mahibaw-an na pinaagi sa text

TAGBILARAN CITY, Bohol, Mar. 19 (PIA)--Sa mga miyembro sa Social Security System (SSS), mahimo nang mahibaw-an ang status sa mga transaksyon pinaagi lang sa text.

Matud pa ni SSS Vice President for Member Services Mario Sibucao, gihingusgan pa nila ang Text-SSS facility.

Pinaagi lang sa text, mahibaw-an na sa pinakaduol nga buhatan sa SSS sa inyong lugar bisan ang listahan sa mga gikinahanglang dokumento aron mag-claim og benepisyo o mag-usab og impormasyon ang usa ka miyembro.

"Text-SSS enables members to be in touch with SSS wherever they are. It saves them time and money spent in going to SSS branches for inquiries. It also helps members and beneficiaries avoid making multiple visits to our offices because of incomplete requirements," matud pa ni Sibucao.

Pinaagi lang usab sa text, mahimo nang i-inquire ang kalabot sa maternity claim, sickness, disability, retirement, death ug funeral claims apil na usab ang medical benefits ubos sa Employees Compensation program sa mga trabahanteng naa sa pribadong sektor.

Mahimong morehistro ang mga miyembro pinaagi sa pagpadala sa 2600 sa SSS number ug petsa sa adlaw'ng natawhan sa format nga "SSS REG ".

Makadawat ang nagparehistrong miyembro og Personal Identification Number (PIN) code nga kinahanglan sa Text-SSS transactions.

Sa mga overseas Filipino workers (OFW), self-employed individuals (SELF) o bisan mga voluntary members (VOL), text na lang usab ang kaatbang aron makuha niya ang listahan sa mga dokumento aron makaparehistro isip SSS member. Kinahanglan lamang i-text ang "SSS " sa 2600.". (PIA-Bohol/ecb)