No campaign fund disclosure, di makalingkod sa puwesto TAGBILARAN CITY, Bohol, Mar. 16 (PIA)--Posibleng dili makalingkod sa puwesto ang bisan kinsang lokal nga opisyal nga modaug sa eleksyon sa sunod tuig kun mapakyas niyang ideklarar sa Comelec ang iyang gastos sa pangampanya. Kini, isip pagsunod sa memorandum of agreement nga gilagdaan sa Comelec ug Department of Interior and Local Government (DILG) kalabot sa hingpit nga pagpatuman sa campaign finance rules. Matud pa ni Comelec Chairman Sixto Brillantes, kini isip pagsunod sa Section 14 sa Republic Act 7166 o An Act Providing for Synchronized National and Local Elections nga nagbawal sa mga minaug nga opisyal nga molingkod sa puwesto kun mapakyas sa pagsumite sa ilang statement of campaign contributions and expenditures. Kauban sa milagda sa maong kasabotan silang Comelec Chairman Sixto Brillantes,  Commissioner Christian Robert Lim, DILG Secretary Jesse Robredo ug DILG OIC for Public Affairs Ariel Tanangonan. Sigun pa kang Brillantes nga ubos sa maong probisyon, ang matag kandidato ug treasurer sa matag partido kinahanglang  mohatag sa poll body sa detalyadong statement sa tanang nadawat niyang kontribusyon ug nagasto sa kampanya sulod sa 30 ka adlaw human sa eleksyon. Sa higayong dili makalingkod ang natudlo nga opisyal, gipasabot usab ni Brillantes  nga ipatuman ang rule of succession. (PIA-Bohol/ecb) ______________________________ Panglao, gi-ila isip 'one of best secret beaches on earth'   TAGBILARAN CITY, Bohol, Mar. 16 (PIA)--Gitaho sa Department of Tourism (DOT) niadtong Miyerkoles nga ang isla sa Panglao sa probinsiya sa Bohol gi-ila isip 'one of the world's best secret beaches' sa inilang magazine nga Travel+Leisure. Sa ilang March 2012 issue, naapil ang isla sa Panglao isip usa sa '15 beach hideaways' ug   gihulagway isip  "understated, unexpected, and—at least for now—under the radar." Ang ubang best secret beaches nga naapil sa maong magazine nag-apil sa: Todos Santos sa Baja California Sur, Mexico; Puako, Big Island sa Hawaii; Ibo Island sa Mozambique; Phu Quoc Island sa Vietnam; Salema sa Portugal; Bethany Beach sa Delaware; Palm Beach sa Barbuda; Cirali Beach sa Turkey;  Koh Lanta sa Thailand; Grand Haven sa Michigan; Lord Howe Island sa Australia; Pyla-sur-Mer sa France; Cayucos sa California ug Alagoas sa Brazil. Gi-ila usab sa maong magazine ang Chocolate Hills, Balicasag Island, ug Puntod Island, ug ang dolphin watching isip ubang atraksyon sa Bohol. (PIA-Bohol/ecb)