PDEA, naalarma na sa nagkadaghang drug mules gikan sa Africa

TAGBILARAN CITY, Bohol, Mar. 15 (PIA)--Naalarma na ang Philippine Drug Enforcement Agency (PDEA) sa nagkadaghang drug couriers gikan sa Africa nga nagtinguhang magpasulod og iligal nga droga sa nasud. 

Base sa talaan sa PDEA, niini lamang Enero karong tuiga, mikabat na sa walo ang naaresto sa ahensya nga gidudahang mga miyembro sa African drug syndicates. 

Sukad tuig 2010 hangtud karon, mikabat na sa 52 ang naaresto nga suspected African traffickers ug 38 niini naaresto dinhi sa Pilipinas.

Samtang gibutyag sa PDEA nga naa na sa ilang buhatan ang Pinay nga giingong ka konsabo sa international drug ring nga maoy nagpaluyo sa mga nadakpang drug couriers gikan sa Africa.

Wala una gi-prerentar sa PDEA ang maong Pinay tungod kay kasamtangan pang gipahigayon ang imbestigasyon.

Una nang nadakpan sa Ninoy Aquino International Airport (NAIA) ang usa ka taga-Uganda nga adunay dala nga P20 milyon nga kantidad sa shabu ug misunod ang taga-Republic of Guinea ug magtiayong Ghanian nga misuway usab pagpalusot sa iligal nga droga.

Matud pa sa PDEA, posibleng mas lawom pa ug mas lapad ang koneksyon niini apil na ang Pinay nga sindikato sa droga. (PIA-Bohol/ecb)

_____________________________

IC, mideklarar og moratorium sa delayed payments sa Prudentialife

TAGBILARAN CITY, Bohol, Mar. 15 (PIA)--Mideklarar og moratorium ang Insurance Commission (IC) sa penalty sa mga delayed payments sa pre-need planholders sa Prudentialife Plans.

Sa public consultation nga gipahigayon kagahapon sa IC grounds, miingon si IC Commissioner Emmanuel Dooc nga ang tanang mga claims nga na-raffle sa wala pa ang Pebrero 6 maserbisyuhan pa gihapon.

Mitakda na usab sa ikaduhang conservator ang IC aron tan-awon ang corporate assets sa Prudentialife Plans Incorporated ug mga kaalyadong kumpanya niini.

Ang maong lakang gihimo aron mahingpit na ang rehabilitation program sa Prudentialife Plans. (PIA-Bohol/ecb)