E-blotter ipahimutang 

sa Bohol sa Abril 2012 

Rey Anthony Chiu 

JAGNA, Bohol, Marso 14, 2012 (PIA) –Paningkamotan ni Police Provincial Director Constantino Barot nga malusad gihapon dinhi sa Bohol ang e-blotter, e-rogues ug e-warrants sa buwan sa Abril. 

Kini bisan pa sa dayag nga kamatuoran nga dakong pahat niini ang adto magasukad sa mga munisipyo diin kini nga programa gamiton. 

Ang e-blotter, e-warrants ug e-rogues usa ka computer program nga batonan sa mga estasyonan sa kapolisan sakalungsuran sa Bohol aron mas dali ug mas sayon ang pagsumpo sa krimen pinaagi sa hiniusa nga aksyon sa kapolisan. 

Matud pa, pinaagi sa programa, malili sa kapolisan ang mga records sa botter, warrants ug kadtong mga gipangita sa balaod sa ilang mga silingang lungsod ug mahimong mas sayon ang paglutos sa mga sad-an. 

Matud ni Barot, ang pagbaton sa computer program nga electronic blotter, electronic warrants ug electronic rogues makasalbar sa oras tungod sa mas gipasayon na nga pagtandi sa mga records. 

Didto sa Talakayan Sa Isyung Pulis (TSIP) sa Jagna Marso 14, si Barot mibutyag sa media nga ila na nga gimandu-an ang mga hepe sa kapolisan sa pag-agni sa mga mayor nga mopahimutang sa computer hardware aron magamit alang niining katuyu-an. 

Sa tigum usab sa Provincial Peace and Order Council (PPOC) sa miaging semana, napagawas usab ni Barot ang sugyot sa paghiusa sa usa ka electronic system sa tanang estasyon sa kapolisan aron mas mapadali ang mga proseso. 

Amenado ang hepe sa kapolisan sa Bohol nga may mga lugar sa lalawigan nga walay signal, hinungdan nga walay mga konesksyon sa internet ang mapaabot. 

Nalakbitan ni Col. Bariot ang lungsod sa Pilar ug Sierra Bullones nga lakip sa mga lungsod diin mahimong maglisud ang pagpatuman sa e-warrants, e blotter ug e-rogues. 

Hinuon, bisan pa niini, misalign si Barot nga kahimoan gihapon kini og paagi. (30)

===========

Mayor Abrenilla nangunay 

Abi-abi sa TSIP sa Jagna 

Rey Anthony Chiu 

JAGNA, Bohol, March 14, 2012 (PIA) –Mahinangpong gi-abi-abi ni Mayor Fortunato Abrenilla ang Talakayan sa Isyung Pulis (TSIP) samtang iyang gidason ang labing dako nga panginahanglan sa lig-on ug kasaligang komunikasyon sa kapolisan ug komunidad. 

Si Mayor Abrenilla, kinsa maoy mibukas sa TSIP sa iyang lungsod, Marso 14, 2012, mipalubad sa ligdong nga gimbuhaton sa pagbayloay sa kasayuran sa pagpaningkamot alang sa kahusay ug kalinaw, seguridad ug sa nasudnong katuyuan sa kalambu-an. 

Sa forum nga didto mahitabo sa sulod sa Sangguniang Bayan Hall, mipadayag si Mayor Abrenilla sa napanahon nga programa kanus-a may nga kabag-ohan sa komunidad ug pamulis nga angayan mahibaw-an sa katawhan. 

Kini usab human giabi-abi sa mayor ang kapolisan nga miduaw sa iyang lungsod. 

Mismo sa Bohol Police Chief Constantino Barot ang nangulo sa mga sakop sa kapolisan nga miatubang sa media alang sa TSIP open forum aron masayran ang dagan sa pagpatunhay sa kahusay ug kalinaw sa kalungsuran. 

Didto usab sa forum mihatag sa ilang mga updates ang mga hepe sa kapolisan sa Dimiao, Valencia, Garcia Hernandez, Jagna, Duero, Pilar ug Sierra Bullones. 

Halos mitaho sa dyutay nga pagsaka sa mga kaso sa krimen ang mga hepe sa kapolisan apan, matud nila, kaya pa nga dumalahon kini ilabi na sa dugang pang police visibility ug sa siyentipiko nga pagtubag sa pagpugong sa krimen nga ilang gisaad nga hingusgan. 

Hinuon, sa Jagna, 50% ang pagkunhod sa kaso sa krimen kon itandi sa milabayng buwan, matud ni PSInspector Mercedarius Balabat III. 

12 ka krimen ang natala sa lungsod sa Enero ning tuig, apan 6 na lang ang natala sa blotter sa kapolisan sa Jagna sa Pebrero. 

Sa unom nga kasong natala, tulo niini gi-konsiderar na sa kapolisan didto nga solbad na, segun sa taho ni Balabat. (30)