Fuel price consultative forum

Himoon sa Tropics, Marso 23

Rey Anthony Chiu 

TAGBILARAN CITY, Marso 20, 212 (PIA) – Ipahigayon ang usa ka Consultative Forum nga kabahin usab sa mga nagkasunod nga panagtigum aron hisgutan ang Presyo sa Gasolina dinhi Rehiyon 7, didto sa Bohool Tropics Resort Marso 23, sa may ala 1:00 ang takna sa palis. 

Matud ni Gobernador Edgar Chatto, samtang ang nasud gipasinati sa padayong nagasulbong nga presyo sa paliton dala sa padayon usab nga pagtaas sa presyo sa gasolina, mas katingad-an ang nasinati nga sobrang kamahal sa fuel retail price index sa Kabisay-an kon itandi sa nagkadaiyang lugar sa nasud. 

Kahinumduman nga nakutaw ang kontrobersya sa presyo sa gasoline ug krudo dinhi human namatikdi nga mas barato ang gasoline sa ubang lungsod sa Bohol kon itandi sa Tagbilaran. 

Dinhi na tisok sa hunahuna sa kadaghanan nga may nagpa-ginansya gayud sumala sa namatikdan. 

Kini hinuon, una na nga gihimakak sa mga tigpamaligya og gasolina sa premium ug krudo, ug dayon ilang gipasanginlan ang kawalay kometisyon dinhi. 

Aron ikapatin-aw sa mga konsumidor ang padayong panghitabo, butyag sa gobernador nga ang consultative forum tabongan sa mga sakop ug tinugyanan sa Department of Energy Oil Industry Management Bureau, ang Rehiyonal nga buhatan sa Department of Trade and Industry ug ang mga representante sa tulo ka labing dagkong kompanya sa lana.

Tumong sa tigum ug konsultasyon nga mahatagan sa mga major oil companies ang katawhan sa tataw nga private sector perspective aron masabtan sa tanan ang mga implikasyon sa panghitabo, dason ni Chatto. 

Imbitado usab sa tigum ang nga local nga tipang-apud-apod sa gasolina, mga tag-iyahag gasolinahanug uban pang may gipanalipdang katungod aron may pagpasabtanay, tugkaron ang nagpadayong kinaiya sa industriya ug aron magsugyot sa mga angayang buhaton subay niini.   

Kini nga tigum mahimong mao nay ika tulo na sa Bohol diin gi-aghat ang mga tinugyanan sa DOE sa pagpasabot. (30)

============

Kapolisan mitanum og kapin sa 

2000 ka kahoy sa Pebrero 2012

Rey Anthony H. Chiu

TAGBILARAN CITY, Bohol, Marso 20, 2012 (PIA) – Agi og pagtampo sa mga buhat aron pagpahiuli sa kalikopan ug pagsuporta sa National Greening Program (NGP), kapin sa duha ka libong punuan sa kahoy ang natanum sa mga kapolisan sa Bohol Provincial Police Office (BPPO) sa buwan lamang sa Pebrero. 

Matud ni Police Provincial Director Constantino Barot, labing gikinahanglan na nga ang kapolisan makig-unong sa labing dinalian nga gimbuhaton sa pagtabang aron mahiuli na ang nagkausab nga tempo sa kalibutan. 

Ang pagpananum og kahoy usa sa mga gituohang makatabang sa pagpahiuli sa kalibutan, dason ni Barot. 

Tungod niini, naaghat ang 79 ka sakop sa BPPO sa pagpananum og kapin kon kulang 300 ka punuan nga kahoy didto sa Sikatuna Tree Park sa Cambuac Sur Sikatuna, niadtong Pebrero 4, matud sa tinubdan sa Kampo Dagohoy. 

Sa laing bahin, niadtong adlaw sa mga kasingkasing, gipabati sa mga sakop sa kapolisan sa BPPO, pinanguluhan ni Police Provincial Director Barot ang ilang gugma sa kalikopan pinaagi sa pagtisok sa kapin kon kulang 350 ka lindog sa kahoy didto na usab sa Baucan Sur, Balilihan niadong Pebrero 14. 

Dugang pa, tulo ka adlaw human ang pagpananum, laing gibanabana nga 500 ka lindog sa kahoy ang didto na usab itanum sa mga sakop sa kapolisan sa tubig saluran sa Toril, Alburquerque.

  

Sa tulo ka hugna sa pagpananum, kining tanan didto mahitabo sa mga upland areas sa Bohol.

Aron usab makompleto ang ilang kalihukan, mihimo usab ang kapolisan sa Kampo Dagohoy sa pagpananum og bakhaw sa hunasan sa pantalan sa Maribojoc niadtong Pebrero 24. 

Gibanabana nga mokabat sa 1500 ka tongki sa bakhaw ang natisok sa bahan sa kapolisan niadong adlawa. 

Kining tanang kalihukan, ubos sa Project Tree, kansang tumong mao ang pagtampo sa kalihukan sa pagpananum og kahoy subay sa NGP, sumala ni Barot.

Buot usab namo nga ipabati sa komunidad nga kami andam sa pag-unong sa tanan sa mga buhat aron himoon ang kalibutan nga mas maayong lugar kapuy-an, pasabot niya. (30)