State visits ni PNoy karong tuiga, nakahan-ay na TAGBILARAN CITY, Bohol, Mar. 21 (PIA)--Nakahan-ay na ang mga biyahe ni Presidente Benigno 'Noynoy' Aquino III sa ubang nasud karong tuiga. Sa Abril 3 ug 4, gitakdang mo byahe padung Cambodia ang Presidente alang sa Association of Southeast Asian Nations (ASEAN) Summit. Apil pa gihapon kini sa mga state visit sa Presidente sa mga nasud nga adunay kalabot ang Pilipinas partikular na sa larangan sa economic ug trade relations. Gawas sa Cambodia, giangkon usab sa Presidente ang nakahan-ay niining state vi­sit sa mga nasud sa Australia ug New Zealand ug apil na usab sa Estados Unidos ug United Kingdom. Wala pay pinal nga petsa apan giingong mahimong sa buwan sa Mayo o Hunyo ang iyang pag-adto sa Estados Unidos isip pagsanong sa imbitasyon ni US President Barack Obama. Gitakda usab nga mo adto sa Vladivostok sa Russia ang Presidente alang sa 24th Asia-Pacific Economic Cooperation (Apec) Leaders' Summit sa Setyembre. Apan dili pa pinal kun makatambong ba ang Presidente sa Rome sa  Oktubre aron motambong sa ca­nonization sa ikaduhang Pilipino nga mahimong Santo nga si Blessed Pedro Calungsod. (PIA-Bohol/ecb) _____________________________  DoH nipasidaan batok sa food poisoning karong summer TAGBILARAN CITY, Bohol, Mar. 21 (PIA)--Nipasidaan sa publiko ang Department of Health (DOH) nga mag-amping batok sa food poisoning karong panahon sa ting-init. Matud pa sa DOH, modaghan ang mikrobyo sa pagkaon ug dali kining mapan-os tungod sa init nga panahon.   Giingong pipila sa mga sintomas sa food poisoning ang pagsakit sa tiyan, pagsuka, pagkalibanga ug panagsa, paghilanat.   Dugang pa sa DOH, kun makasinati sa maong mga sintomas, mokunsulta gayud dayon sa doktor tungod kay kun dili kini matagad dayon, mahimo kining ikamatay. (PIA-Bohol/ecb) _________________________ DFA mikompirmar nga dili na modawat og OFWs sa Syria TAGBILARAN CITY, Bohol, Mar. 21 (PIA)--Gikompirmar sa Department of Foreign Affairs (DFA) nga ihunong na sa Syrian government ang pagpangdawat og mga trabahanteng Pinoy sa ilang nasud. Sa usa ka radio interview, gibutyag ni Ambassador Ricardo Endaya nga ni-isyu na og kamanduan ang Ministry of Interior sa Syria nga gikan na lamang sa mga nasud sa Indonesia, Nepal, Vietnam, Bangladesh ug Sri Lanka ang mga domestic helper nga kuhaon sa Syria.   Matud pa ni Endaya, mahimong epektibo ang maong kamanduan sa unang adlaw sa buwan sa Abril.    Giingong resulta kini sa nahimong pagkig-hinabi ni DFA Secretary Albert del Rosario sa kagamhanan sa Syria nga paulion na ang mga Pinoy tungod sa nagkagrabeng kahimtang sa seguridad didto.   Bisan pa niini, gipasabot ni Endaya nga sa higayong mabalik na ang maayong kondisyon sa Syria, mahimo pang mohimo og kasabotan pagbalik ang atong gobyerno sa Syrian government aron sa pagpasulod og balik sa mga trabahante didto. (PIA-Bohol/ecb) _________________________   Bag-ong low pressure, nasigpatan sa sidlakang Mindanao   TAGBILARAN CITY, Bohol, Mar. 21 (PIA)--Padayon nga naghatud og mga pag-ulan sa Bicol Region ug Visayas ang low pressure area (LPA) nga nasigpatan sa 160 kilometro sa amihanang kasadpan sa Dumaguete City o 120 kilometro sa habagatang sidlakan sa Cuyo Island.   Matud pa sa Pagasa, gawas nga baga ang dala niining gabon, giingong lapad usab kini mao nga apil ang mga lalawigan sa Southern Luzon apektado na usab.   Samtang gawas sa low pressure area sa Visayas, usa pa ka bag-ong napormang bati nga panahon ang nasigpatan sa sidlakang bahin sa Mindanao.   Sa taho sa Joint Typhoon Warning Center (JTWC) nasigpatan ang maong weather disturbance formation sa gilay-ong kapin sa  800 kilometro sa sidlakang bahin sa Mindanao. (PIA-Bohol/ecb)