Balaod batok pagmaneho nga hubog ug naka-droga, gilagdaan na ni PNoy

TAGBILARAN CITY, Bohol, May 31 (PIA)--Gilagdaan na ni Presidente Benigno ‘Noynoy’ Aquino III ang balaod nga magpahamtang og silot sa mga hubog ug ubos sa impluwensya sa ginadili nga droga samtang nagmaneho og sakyanan.

Gilagdaan sa Presidente niadtong Mayo 27, 2013 ang Republic Act 10586 o ang “Anti-Drunk and Drugged Driving Act of 2013”.

Gihatagan og gahom sa maong balaod ang Land Transportation Office (LTO) nga mopahigayon og terminal inspection ug random test sa mga nagmaneho og sakyanan sa tibuok nasud. Gitugotan usab niini ang LTO nga tahasan ang mga traffic enforcer og PNP, MMDA ug mga local government unit (LGU) nga ipatuman ang maong balaod.

Tungod niini, mahimo nang parahon sa law enforcement agencies ang usa ka sakyanan kun gidudahan nilang hubog o naka-droga ang driver.

Ipaubos nila kini dayon sa field sobriety test sama sa horizontal gaze nystagmus, walk and turn, one-leg stand, ug gamitan og breath analyzer aron masukod ang ‘blood alcohol concentration level’.

May silot nga pagkabilanggo nga tulo ka buwan ug multa nga P20,000 hangtud P80,000 kun mahagbong sa test.

Kun ang pagmaneho samtang nakainom o naka-droga magresulta sa ‘physical injuries’, mas taas nga buwan nga pagkabilanggo sigun sa Article 263 sa Revised Penal Code ang ilang atubangon, gawas pa sa multa nga P100,000 hangtud P200,000. Sa Article 263 sa Revised Penal Code, ang ‘serious physical injuries’ adunay jail term nga ‘aresto mayor’ hangtud ‘prision mayor’ o pagkabilanggo gikan unom ka buwan hangtud 12 ka tuig depende sa injuries sa biktima.

Samtang kun ang drunk/drugged driving magresulta sa kamatayon, ang jail term base sa Article 249 sa Revised Penal Code may multang P300,000 hangtud P500,000. Sa Article 249 sa Revised Penal Code, ang kasong homicide adunay jail term nga ‘reclusion temporal’ o pagkabilanggo gikan 12 hangtud 20 ka tuig.

Gawas sa pagkabilanggo ug multa, ang non-professional driver’s license sa molapas niining bag-ong balaod kumpiskahon ug suspendihon sulod sa 12 ka tuig sa unang conviction samtang perpetually revoked usab sa ikaduhang conviction.

Mas bug-at sa mga naggunit og professional driver’s license tungod kay confiscation ug perpetually revoked dayon ang ilang lisensya sa unang conviction. Sa perpetual revocation, dili na sila mahatagan pa og bisan unsang matang sa driver’s license sa tibuok nilang kinabuhi.

Samtang pareho usab ang mahimong silot sa mga operator ug tag-iya sa mga public utility vehicles sama sa delivery vans, cargo trucks, container trucks, school ug company buses, hotel transports, cars o vans for rent, taxi cabs ug uban pang sakyanang kapareho niini.

Dungan sa tabang sa local government units, ang Philippine Information Agency (PIA) gitahasan usab sa pagpahigayon og nationwide information campaign kalabot niining bag-ong anti-drunk and drugged driving law. (PIA-Bohol/ecb)

=============

Competitiveness rating sa PH, nisaka

TAGBILARAN CITY, Bohol, May 31 (PIA)--Nisaka sa lima ka lakang ang competitiveness rating sa nasud sa 2013 World Competitiveness Yearbook (WCY) nga gipagawas sa International Institute for Management Development (IMD) sa Switzerland.

Gikan sa ika-43 nga pwesto niadtong 2012, naa na sa ika-38 nga pwesto karon ang Pilipinas gikan sa 60 ka nasud. Dakung pagsaka kini gikan niadtong 2009 nga pang-43, pang-39 niadtong 2010 ug pang-41 niadtong 2011.

Ang maong ranking gi-base sa Economic Performance, Government Efficiency, Business Efficiency ug Infrastructure.

Sa economic performance sa Pilipinas karong 2013, namatikdan ang "improvement" sa nasud sa domestic economy ug international trade bisan ni-ubos sa international investment, employment ug prices. Niadtong 2009, pang-51 ang Pilipinas sa economic performance ranking apan nahimong pang-29 niadtong 2011, nahagbong sa pang-42 niadtong 2012 apan nakabawi ra karong 2013 sa pang-31.

Sa Government Efficiency, gibutyag sa WYC nga gikan sa rank 32, nahimong 31 ang Pilipinas.

Sa Business Efficiency usab may pinakadakung pagsaka sa ranking ang Pilipinas. Gikan sa kanhi 26th, nahimong pang-19 kini ug gitumbok nga hinungdan ang pagkusog sa stock market .

Samtang sa infrastracture lamang nakakuha og pag-ubos sa ranking, gikan sa 55 nahimong 57. Matud pa sa AIM, nagpabiling hagit sa nasud ang imprastraktura partikular ang mga kadalanan ug tugpahanan nga giingong "beyond capacity"; kakulang sa trabaho; undeveloped financial system ug access to finance ug bisan ang mga kalamidad.

Apan bisan pa niini, ang Pilipinas ang may maayong pagsaka sa ranking sa Asya karong tuig matud pa sa AIM Policy Center. (PIA-Bohol/ecb)