Palasyo: OFWs sa Taiwan, di pa kinahanglang paulion 

TAGBILARAN CITY, Bohol, May 20 (PIA)--Masaligon ang Malakanyang nga masolbad ra ang tensyon tali sa Pilipinas ug Taiwan taliwala sa mga natahong pagpanakit sa pipila ka Taiwanese nationals sa mga OFWs human mapatay sa Philippine Coast Guard (PCG) ang usa ka mangingisdang Taiwanese. 

Matud pa ni Communications Sec. Sonny Coloma, misalig sila sa gibuhiang pahayag ni Taiwanese Pres. Ma nga padayon ang himuong negosasyon aron dili maguba ang relasyon sa duha ka nasud. 

Dugang pa ni Coloma, padayon pa nilang gi-validate ang mga gikatahong pagpanakit sa atong mga isig ka Filipino didto sa Taiwan apil na ang natahong pagkamatay sa usa ka OFW. 

Samtang miingon karong buntag si MECO chairman Amadeo Perez nga naka-monitor sila sa mga panghitabo sa Taiwan ug wala pa nila nakita nga kinahanglang paulion na ang mga OFWs. 

Gipahayag ni Perez nga kun gikinahanglan na kini, andam ang gobyerno aron iuli ang naa sa 80,000 ka trabahanteng Pinoy sa Taiwan aron dili madamay. 

Nagtuo si Perez nga dili basta na lamang buhian sa mga Taiwanese employers ang mga OFWs tungod kay maayo ug highly-skilled workers sila sa mga pabrika didto. (PIA-Bohol/ecb/i-gg) 

=============

DepEd, magdugang og 60,000 ka mga bag-ong magtutudlo 

TAGBILARAN CITY, Bohol, May 20 (PIA)--Mokuha og 60,000 ka mga bag-ong magtutudlo ang De­part­ment of Education (DepEd) karong umaabot pagsugod sa klase sa mga pampublikong tunghaan human gi-aprubahan na ang pondo alang sa pangpa-sweldo niini. 

Gibutyag sa DepEd ang pag-aprubar sa Department of Budget and Management (DBM) sa dugang 61,510 teacher items alang sa fiscal year 2013. 

Kini aron makunhoran ang kakulang sa mga magtutudlo sa pampublikong elementarya ug high school sa tibuok nasud. 

Base sa DepEd Order No. 23 series of 2013, ang mga magtutudlo nga ma-redeploy sa ubang lugar makadawat sa kas-ang higayong nga “redeployment allowance” nga P18,000 . 

Gitahasan na ni Education Sec. Armin Luistro ang mga school heads nga adunay sobrang mga magtutudlo nga mohimo og imbentaryo sa ilang mga magtutudlo apil ang lebel nga gitudluan ug asignatura aron maoy basehan sa k­walipikasyon. 

Mahimo usab mohimo ang mga magtutudlo nga buot ma-redeploy og “letter of intent” sa ilang mga “division su­perin­tendents”. (PIA-Bohol/ecb/i-gg)