PH standard time law, gilagdaan na ni PNoy
TAGBILARAN CITY, Bohol, May 24 (PIA)--Gilagdaan ni Presidente Benigno ‘Noynoy’ Aquino lll ang Republic Act 10535 nga nagtakda sa Philippine Standard Time (PST).
Base sa maong balaod, gimanduan ang tanang ahensya sa gobyerno ug local government units nga gamiton na ang PST nga itakda sa PAGASA-DOST.
Matud pa ni Deputy Presidential Spokesperson Abigail Valte, ang RA 10535 o PST Act of 2013 gilagdaan sa Presidente niadtong Mayo 15.
Kinahanglang makig-alayon ang tanang ahensya ug LGU’s apil na usab ang mga tunghaan, pribadong opisina, TV ug radio stations sa PAGASA-DOST aron ma-synchronized ang ilang official time piece ug devices matag buwan.
Pahamtangan og multa nga gikan P30,000 hangtud P50,000 sa 1st offense ug cancellation sa ilang prangkisa sa 2nd offence ang mga tag-iya og TV ug radio stations nga pakyas itakda ang ilang orasan base sa PST sa ilang mga broadcast.
Nakalatid usab sa maong balaod nga isaulog ang National Time Consciousness Week kada unang semana matag tuig.
Alang sa iksaktong pagtakda sa oras, mahimo kining makita sa website sa PAGASA-DOST nga http://kidlat.pagasa.dost.gov.ph/ourtime.shtml. (PIA-Bohol/ecb/i-gg)
===============
PNoy, gilagdaan na ang balaodnon nga mopahamtang
og bug-at nga silot sa mga mamaligya og ‘botcha’
TAGBILARAN CITY, Bohol, May 24 (PIA)--Mokabat P100,000 hangtud P1 milyon ang multa ug pagkabilanggo gikan 6 hangtud 12 ka tuig ang silot sa masakpang mamaligya og ‘botcha’ o double dead nga karne sa merkado.
Kini human gilagdaan ni Presidente Benigno ‘Noynoy’ Aquino III ang usa ka balaodnon aron mapabug-at ang silot sa mga mamaligya og ‘botcha’.
Matud pa ni Deputy Presidential Spokesperson Abigail Valte, gilagdaan sa Presidente niadtong Mayo 15 ang Republic Act No. 10536 aron amyendahan ang National Meat Inspection Code of the Philippines.
Nanghinaot si Valte nga sa paglagda niining bag-ong balaod, makuhaan kun dili man padayon nang mahunong ang pagpamaligya sa mga double dead nga karne sa merkado tungod sa bug-at na nga silot niini.
Ubos niining balaod, ang unsa mang karne sa hayop nga gi-ihaw gikan sa unregistered/unaccredited meat establishment ug wala mopaubos sa inspeksyon, i-klasipika isip ‘hot meat’.
Samtang ang mga smuggled, undocumented ug unregistered nga karne ug meat products gikan sa ubang nasud, i-klasipika usab isip ‘hot meat’. (PIA-Bohol/ecb/i-gg)
=============
Osorio, bag-ong CSC Commissioner
TAGBILARAN CITY, Bohol, May 24 (PIA)--Gipahibalo sa Civil Service Commission (CSC) nga may bag-o silang commissioner.
Si Nieves L. Osorio, nihimo sa iyang oath of office atubangan ni Chairman Francisco T. Duque III niadtong Lunes, Mayo 20, sa usa ka yanong seremonya nga gipahigayon sa CSC Central Office sa Diliman, syudad sa Quezon.
Kanhi Chairperson sa Career Executive Service Board (CESB), si Osorio natudlo isip ad interim commissioner niadtong Marso 20 sa Office of the President nga maoy nihulip ni kanhi Commissioner Mary Ann Z. Fernandez-Mendoza. Matapos ang iyang termino sa Pebrero 2020.
Isip bag-ong Commissioner, dalhon ni Osorio sa CSC ang iyang halapad nga kasinatiaan sa managerial ug executive sa pagserbisyo sa gobyerno, apil na usab ang iyang adbokasiya alang sa good corporate governance.
=================
Si Osorio nagkupot og Career Executive Service Officer (CESO) Rank I.
Nialagad siya isip President and Chief Executive Officer sa Power Sector Assets and Liabilities Management (PSALM) Corporation gikan 2005 hangtud 2007 ug isip Finance Undersecretary niadtong 2001 hangtud 2005.
Nialagad usab siya isip Executive Vice President sa Philippine National Oil Company (1996 -2001, Director IV sa Department of Budget and Management (1988-1995) ug Assistant National Treasurer (1984-1988).
Aduna usab siya’s kasinatian sa academe isip instructor/faculty member/lecturer on statistics, public administration, tax policy, ug business administration.
Si Osorio nakatapos sa iyang Master of Business Administration and Bachelor’s degree in Statistics sa University of the Philippines. (PIA-Bohol/ecb)
=============
DepED nanawaga’g pag-apil
Sa Brigada taman sa Sabado
Rey Anthony Chiu
TAGBILARAN CITY, Bohol. May 23, 2013 (PIA) – Padayon pang nanawagan ang Department of Education ngadto sa mga ginikanan, silingan ug mga tawong may kasibut sa pagtabang sa edukasyon sa kabataan sa pag-apil sa boluntaryong buhat pag-pahiluna sa mga tunghaan aron makasugod dayon ang klase sa Hunyo 3.
Matud ni Desiderio Deligero, dili pa maatul sa DepED ang pagsagubang sa mga gimbuhaton niini ilabi na sa dugang pagpangandam sa nagsingabot nga pagbukas sa klase.
Si Deligero, kinsa namahayag sa Kapihan sa PIA sa ngalan ni Superintendent Wilfreda Bongalos nga kasamtangang tua sa opisyal nga lakaw, mipasabot nga sa kanunay, ang pagpa-edukar sa kabataan naginahanglan sa hiniusang tabang sa katilingban.
Si Deligero, kinsa usab maoy Resource Generation and Mobilization Unit Chief sa DepEd Bohol Division nanawagag dugang moapil sa Brigada Eskwela.
Gibuksan ang nasudnong kalihukan sa Brigada Eskwela 2013 niadtong Lunes ug malanat pa kini hangtud sa Sabado pohon, Mayo 25.
Sa mga tunghaan, gihimo sa mga bluntaryo ang pagpang-ayo sa mga guba nga lingkoranan, pansayan, suga, pagpanglimpyo, pagpamintura, pag-ayo sa mga koral, ug sa pagpanghinlo sa mga natad niini.
Karon ania na sa iyang ika napulo ka tuig, ang kalihukan sa Brigada Eskwela usa sa mga gimbuhaton ilawom sa programang Balik Eskwela diin nasakop ang national schools maintenance week.
Tumong ka kalihukan nga iapil ang mga stakeholders sa pagpa-edukar sa bata nga makiglambigit sa mga gimbuhaton sa pagpahiuli sa mga lawak klasehanan, paglimpyo sa palibot sa tunghaan, pagpintura, pagtukod og dugang mga pasilidad alang sa mga bata ug sa pagseguro nga magsugod dayon ang klase sa pagbukas sa schoolyear akrong Junyo 3.
Butyag usab ni Deligero nga ang mga stakeholders naglangkob sa mga ginikanan, mga silingan, mga negosyo ug establisemento nga ganahan moabaga sa responsibilidad sa maayong pagpatungha sa kabataan.
Kini bisan pa usab sa nagpadayon ang mga indigay sa tanang mga tunghaang publiko sa Bohol sa labing maayong programa sa pagpatuman sa boluntaryong buhat, matud sa tinugyanan sa DepEd.
=============
4 ka tunghaan gipasidunggan sa
pagpatuman sa Brigada Eskwela
Rey Anthony Chiu
TAGBILARAN CITY, Bohol. May 23, 2013 (PIA) – Gipasidunggan sa mga tinugyanan sa Department of Education ang upat ka mga tunghaan sa Bohol nga napili sa ilang labing maayong programa sa pagpatuman sa Brigada Eskwela (BE) sa imaging tuig.
Ang Bridaga Eskwela programa sa DepEd ilawom sa Adopt a School ug sa usa ka bahin lamang sa Oplan Balik Eskwela sa kagamhanan.
Niini, giaghat ang mga ginikanan ug mga tawong bisag walay anak nagtungha sa pangpublikong tunghaan sa pagboluntaryo aron tabangan paghipno ang mga buhaton aron i-andam ang mga eskwelahan sa pagbukas sa klase.
Sa 960 ka tunghaang elementary ug sekondarya nga gibahig sa upat ka kategorya, napili ang upat ka mga tunghaan sa ilang nindot nga pagpatuman sa Brigada, matud ni Desiderio Deligero sa DepEd Bohol Division.
Si Deligero, kinsa namahayag sa ngalan ni Dr. Wilfreda Bongalos, superintendente sa Bohol Division, mibuytag nga ang tunghaang elementarya sa La Victoria Valencia midaug sa small schools category sa Best BE implementer.
Sa mga middle schools, ang Estaca Elementary School sa Pilar maoy nisakmit sa pasidungog.
Sa mga small high schools, ang Garcia Hernandez High School ang nakadaug sa imaging tuig samtang pabilin nga gihuptan sa Sandingan High School sa Calape ang dungog isip Best Program Implementor sa Brigada Eskwela sa ika tulo na ka tuig sunod-sunod, matud ni Deligero.
Sa awarding ceremonies nga gidungan sa paglusad sa usa ka semanang school maintenance activity nga didto himo-a sa Sandingan, mihimo ug usa ka caravan ang mga taga DepEd inubanan sa mga magtutudlo sa silingang mga lungsod, aron usab pagpakita sa suporta sa mga ginikanang nangboluntaryo niadtong Lunes.
Giangkon ni Deligero, nga segun sa ilang nasaksihan sa mga na-agi-an nga mga tunghaan sa ilang paghimo sa Caravan, nadam na ang tanan alang sa pagbukas sa klase sa Lunes, Junyo 3.
=============
P42-M pondo alang sa BTC, gipagawas na sa DBM
TAGBILARAN CITY, Bohol, May 23 (PIA)--Sa tinguhang mas mapadali ang peace building efforts sa Mindanao, gipagawas na sa gobyerno ang budget alang sa Bangsamoro Transition Commission (BTC).
Matud pa ni Budget Sec. Butch Abad, ang kinatibuk-ang P42 milyong pondo alang sa BTC apil sa tinguha ni Presidente Benigno Aquino lll alang sa socio-economic reform and development sa Autonomous Region in Muslim Mindanao (ARMM) pinaagi sa pagtukod og Bangsamoro Basic Law.
“This release is meant to cover the initial budgetary requirements of the Transition Commission, particularly for its operational needs. The Aquino administration has already mobilized the necessary talent and resources to establish the commission and ensure its success in drafting the Bangsamoro Basic Law. In the long-term the Transition Commission will play a crucial role in fostering and sustaining peaceful dialogue between the Administration and the Bangsamoro,” pasabot pa ni Abad.
Dugang pa sa kalihim, P25 milyon sa maong budget gamiton sa Bangsamoro sa ilang operating expenses ug P17 milyon ang alang sa sohulan ug benepisyo sa 16 ka appointed commissioners sa BTC.
Ubos sa Executive Order 120, ang Transition Commission gitahasan aron mohimo og balaodnon sa Bangsamoro Basic Law diin angay motukma kini sa 2012 Framework Agreement on the Bangsamoro. (PIA-Bohol/ecb/gg)
==================
PNP: Mga Taiwanese national na nasud,
walay angay ikahadlok sa ilang seguridad
TAGBILARAN CITY, Bohol, May 23 (PIA)--Giseguro sa nasudnong polisya nga gihugtan nila ang seguridad dili lamang sa mga Pilipino apan apil na ang mga turista nga naa sa nagkalain-laing dapit sa nasud apil na ang mga Taiwanese nationals.
Matud pa ni Philippine National Police (PNP) spokesman C/Supt. Generoso Cerbo, hugot ang pagtutok sa kapolisan sa mga lugar nga daghang bisitang turista sama sa Boracay, Tagaytay, Palawan ug uban pang mga tourist destinations sa nasud.
Ang heneral nagkanayon nga walay nadawat nga taho ang PNP nga may nahitabong tensyon o kagubot sa nasud agig resulta sa pagpusil-patay sa mga sakop sa Philippine Coast Guard sa usa ka mangingisdang Taiwanese sa Balintang Channel, kadagatan sa Masbate.
Samtang gi-aghat sa PNP ang mga turista nga isumbong dayon sa kapolisan pinaagi sa mga nakabutang nilang PNP-Tourist Assistance Desks sa nagkalain-laing dapit sa nasud kun may nadawat silang bahad gikan sa mga Pilipino. (PIA-Bohol/ecb/i-sjp)
==================
DA, gibantayan na ang posibleng pagsulod
sa mga kontaminadong bugas gikan China
TAGBILARAN CITY, Bohol, May 23 (PIA)--Gibantayan karon sa Department of Agriculture (DA) ang posibleng pagsulod sa nasud sa mga bugas gikan China nga giingong adunay taas nga “lead content.”
Sa usa ka radio interview, gibutyag ni Asst. Sec. Dante de Lima, National Coordinator for Rice Program nga gipadalhan na nila og sulat ang National Food Authority (NFA), Department of Trade and Industry (DTI) ug Bureau of Customs (BoC) aron masiguro nga dili makalusot ang mga bugas nga kontaminado sa kemikal nga lead.
Base sa gihimong pagsusi, ika-unomon nga mas taas ang nakitang matang sa lead sa mga bugas nga gikan sa China.
Gawas niini, giingong mas taas usab sa kemikal nga cadmium – usa ka heavy metal – ang bugas nga usa ka matang sa kemikal nga mahimong magdala sa sakit nga kanser.
Tungod niini, giingong plano sa DA nga mopahigayon og sample testing alang sa mga rice mill products sama sa noodles, bihon ug uban pang mga produkto.
Apil na usab ang mga bugas nga kontaminado sa kemikal nga lead sa kahadlok nga mahimo kining ma-convert sa uban pang produkto. (PIA-Bohol/ecb/p-gg)
=================
Lima ka labing kulba-hinam
Nga kadaugan dinhi’s Bohol
Rey Anthony Chiu
TAGBILARAN CITY, Bohol. May 22, 2013 (PIA) – Ang bag-ong napili nga mayor sa Cortes maoy labing swerte sa tanang nanaug nga mayor sa Bohol sa milabay nga piniliay.
Miguwa nga mananaug si retired police chief Roberto L. Tabanera sa labaw nga 34 botos lamang batok ni Danilo L. Montero, usa ka propesor ug kanhi bise mayor sa lungsod.
Nakuha ni Tabanera ang 4,342 ka botos samtang 4,308 lamang ang naabot sa boto suporta kang Montero.
Sa laing bahin, gipukan usab ni Pilar Mayor-elect Necitas T. Cubrado, usa ka konsehal sa lungsod ang kanhi bise mayor sa lungsod nga si Wilfredo L. Bernante Sr., sa 46 ka botos lamang.
6,108 ka botos ang naani ni Cubrado samtang 6,062 lamang ang naabot ni Bernante human sa ihap sa balota.
Sa Anda, kanhi mayor nga iya ra usab nga ka-apilyedo ang gipalukapa ni Metodio L. Amper.
Gipatapos sa piliay sa Mayo 13 2013 ang paghari ni kanhi Mayor Paulino Amper sa pag-salga ni Metodio Amper kinsa mipundo og 68 ka botos labaw sa nakuha ni Paulino Amper.
Si Metodio Amper nakatigum og 4,623 ka boto batok sa kang Paulino Amper nga 4,555.
Sa San Isidro, wala maghimpos ang 2,301 ka botos nga natigum ni Quirino S. Samuya batok sa napili pag-usab nga mayor nga si Jacinto Naraga. Si Naraga mikuha og 2,483 ka botos, ug mideperensya sila og 182 botos.
Sa silingang lungsod sa Tubigon, 357 ka botos ang napalabaw ni Marlon R. Amila, kanhi kagawad sa lungsod, batok sa iyang kanhi Mayor William Jao, kinsa miani na unta og 10,664 ka botos.
Nakuha ni Amila ang 11,021 ka botos aron mogawas nga mananaug paglugdang sa aso sa piliay.
Gawas ning lima ka lungsod kansang mga nanaug dyutay lamang og labaw sa kontra, lakip sa mga labing gagmay nga labaw sa ilang labing kusog nga kontra mao ang nakuha ni Mayor Natividad R. Gonzaga sa Danao sa 377 ka botos, ni Mayor Simplicio C. Maestrado Jr sa Sierra Bullones sa 543 ka botos, ni Mayor Allen Rey Z. Piezas Clarin sa 581 ka botos, ni Mayor A. Alvin J. Uy sa Baclayon sa 597 ka botos ug ni Mayor Francisco C. Pepito sa Batuan sa 622 ka botos.
===============
RiverWatch miani og tripadvisor
Certificate of Excellence sa 2013
Rey Anthony Chiu
TAGBILARAN CITY, Bohol. May 21, 2013 (PIA) – Sa tataw nga maayong pagdumala nga miresulta sa taas nga kita sa ilang negosyo, natumbok ang usa ka negosyo nga floating restaurant sa Bohol nga “excellent” sa gikaintapan nga travel rating group nga tripadvisor.
Sa usa ka pahibalo, gitumbok sa tripadvisor for business ang Loboc RiverWatch Floating Restaurant isip apil sa ilang mga gitanyagan sa Certificate of Excellence alang sa tuig 2013.
Segun sa tripadvisor, kinsa maoy naghatag sa sertipiko, ang Loboc RiverWatch nga gipanag-iya sa banay nga Labunog-Sumampong nalakip sa mga top-performing 10% Businesses sa tibuok kalibutan nga nagpasakop sa tripadvisor.
Matud pa, ang sertipiko alang sa Top-performing 10% Businesses sa tibuok kalibutan, usa ka sertipiko nga ihatag ngadto lamang sa nga negosyo nga kanunay o consistent nga nakakuha ug taas nga ratings sa libo-an ka mga turista nga maoy mihatag sa ratings alang sa tripadvisor.
Ang tripadvisor usa ka travel website nga naggiya sa mga byahidor nga turista nga nanginahanglan sa mga kasayuran kabahin sa suroyanan, serbisyo ug uban pang kasayuran aron mapasayon ug mahimong di hikalimtan ang pagsuroy sa usa ka turista.
Ang mga minilyon nga turista usab nga nasakop niini maoy naghatag sa ilang mga ratings segun sa ilang mga kasinatian samtang naggamit sa serbisyo sa turismo ug sa ilang pagbyahe.
Lakip usab sa mga mabasa nga ratings sa mga turista sa RiverWatch restaurant, dili matago ang pagkahaylo sa lamian nga pagkaon nga halos way pagkahubas, ang nindot nga set-up sa buffet table, ang kamaayo sa mga tig-alagad sa pagkaon, ang maayong talan-awon u gang pagkabarato sa tibuok kasinati-an nga naglangkob sa pagkaon, rivercruise ug pagsinati sa local nga kultura.
Ang RiverWatch Floating Restaurant nagkobra sa P350.00 alang sa buffet nga paniudto lakip na ang usa ka serving sa softdrinks, desserts, libreng rivercruise, libreng harana sa mga musikero, ug ninot nga talan-awon sa katilingban sa daplin sa suba sa Loboc.
Sa imaging tuig, laing kan-anan sa Bohol ang gitumbok sa tripadvisor nga destination alang sa mga turistang buot mokaon sa gawas sa ilang mga hotel sa Tagbilaran.
Nahinganlan ang Gerardas isip labing nindot nga lugar kan-an nga dunay labing barato nga lamiang pagkaon nga mohaum sa pangtilaw sa mga turista.
=================
Brigada Eskwela 2013, gilusad sa syudad sa Tagbilaran
TAGBILARAN CITY, Bohol, May 22 (PIA)--Gilusad sa Department of Education (DepEd) niadtong Lunes, Mayo 20 ang 2013 National Schools Maintenance Week o Brigada Eskwela sa syudad sa Tagbilaran pinaagi sa motorcade.
Ang maong motorcade naggikan sa buhatan sa DepEd City Division nga ni-agi sa Mansasa, Dampas, paingon sa Island City Mall, niagi sa dalan J.A. Clarin, niliko sa City Central School ug natapos sa Dr. Cecilio Putong National High School (DCPNHS).
Sa paghidangat sa DCPNHS, gisugdan dayon ang Kick-off Program nga gisalmotan sa mga magtutudlo ug mga opisyal sa mga tunghaan sa syudad, mga tinugyanan sa DepEd-Bohol ug City Division ug sa pribadong sector.
Ang maong kalihokan gibuksan usab sa nagkalain-laing tunghaan sa tibuok nasud.
Gitakda sa Mayo 20 hangtud 25, ang Brigada Eskwela ning tuiga nga naa na sa ika-10 ka tuig, nagdala sa tema nga “Isang Dekada ng Bayanihan sa Paaralan.”
Kining maong kalihokan nagsugod niadtong 2003 diin mag-uban ang mga magtutudlo, prinsipal, mga ginikanan, mga kabataan ug apil na ang tibuok komunidad aron manglimpyo ug i-andam ang mga tunghaan sa pagbukas sa klase sa Hunyo.
Pipila sa mga aktibidad nga gihimo mao ang pag-ayo sa mga kagamitan, pagpamintal sa mga lawak-tunghaan ug pagpanglimpyo sulod sa eskwelahan.
May ubang mga ginikanan usab ug hugpong sa pribadong sektor nga nihatag og mga gamit sa eskwelahan sama sa mga libro ug uban pang mahimong magamit sa mga estudyante.
Atol sa programa sa paglusad sa Brigada Eskwela nga gipahigayon niadtong Lunes sa DCPNHS grounds, gihimo ang pagtunol sa computer ug printer sa mga tinun-an sa DCPNHS Batch 1993 sa mga tinugyanan sa maong tunghaan.
Nihatag usab ang DCPNHS Batch 1988 ug mga gamit sa pagpanglimpyo sama sa mga silhig ug dust pan nga magamit sa gipahigayong Brigada Eskwela.
Nahimo nang inisyatibo sa DepEd ang pag-aghat sa lokal nga kumonidad sa pagtubag sa ubang panginahan sa mga pampublikong tunghaan ug mosalmot sa nasudnong paningkamot sa pagpa-uswag sa Philippine basic education. (PIA-Bohol/ecb/i-gg)
===============
23.9-M ka estudyante, gipaabot nga motungha sa SY 2013-2014
TAGBILARAN CITY, Bohol, May 22 (PIA)--Andam na ang Department of Education (DepEd) nga mosugat sa 23.9 milyon ka estudyante sa pagbukas sa klase sa Hunyo 3.
Matud pa ni DepEd Undersecretary Tonisito Umali, 23.9 milyon ka estudyante gikan kinder hangtud high school ang gipaabot nilang mosulod karong tuig sa mga pampubliko ug pribadong tunghaan diin 3 milyon niini ang sa pribadong tunghaan.
Sa niaging tuig, giingong naa sa 20 milyon lang ang natalang gidaghanon sa mga estudyante.
Apan padayon pa gihapon ang enrollment karon diin ang mga maulahi, kinahanglang mohatag og igong rason ilabi na nga niadtong Enero pa nagsugod ang early registration.
Sa pagbukas sa klase, giingong kakulang pa gihapon sa mga lawak-tunghaan ang mosugat sa mga estudyante.
Gawas sa mga lawak-tunghaan, kulang usab og mga magtutudlo bisan nakakuha na og 61,500 ka mga bag-ong magtutudlo ang DepEd.
Matud pa sa DepEd, 19, 579 ka classrooms pa ang kulang ug target nila kining mahuman sa dili pa matapos ang school year 2013-2014.
Sigun pa kang Umali, niadtong school year 2011-2012, 48,802 ang kulang nga classrooms apan nakapahimo na sila og halos 30,000 niining school year 2012-2013. (PIA-Bohol/ecb/i-gg)
No comments:
Post a Comment