Tabang sa OFWs nga gi-aresto sa Saudi, giseguro sa Malakanyang 

TAGBILARAN CITY, Bohol, May 06 (PIA)--Gitahasan na sa Malakanyang ang Department of Foreign Affairs (DFA) nga susihon ang kahimtang sa tulo ka overseas Filipino workers (OFWs) nga gi-aresto sa Saudi police human mipahigayon og lihok-protesta sa gawas sa Philippine Embassy sa Riyadh. 

Una niini, gitaho ni Philippine Ambassador to Saudi Arabia Ezzedin Tago nga gisikop sa mga otoridad ang tulo ka OFWs tungod sa pagsamok-samok. 

Gitumbok sa opisyal nga giingong walay “justification” ang maong lakang sa mga OFWs ilabi na nga gihimo na sa gobyerno ang tanan aron mapadali ang ilang pagpaule sa nasud. 

Base sa taho, giingong gibuhian ra dayon sa mga otoridad ang mga nasikop nga sila si Lyndon Salonga, Juan Carlos ug Jon Jon de Vera. 

Gibutyag usab ni Tago nga mokabat na sa kapin 7,500 ka Filipino workers ang nagpatala sa ilang intension nga mopaule sa Pilipinas taliwala sa crackdown sa gobyerno sa Saudi batok sa mga overstaying ug undocumented foreign workers. 

Matud pa ni presidential spokesperson Abegail Valte, susihon sa gobyerno ang kaso sa tulo, dungan sa pagsiguro sa tabang o assistance aron makapaule ang mga Pinoy nga gusto nang mopaule sa Pilipinas. (PIA-Bohol/ecb/i-gg) 

=============

DTI, nipasidaan batok sa solicitation scam karong eleksyon 

TAGBILARAN CITY, Bohol, May 06 (PIA)--Nipasidaan ang Department of Trade and Industry (DTI) sa publiko batok sa business scam nga migamit sa mga pangalan nilang DTI Secretary Gregory Domingo ug Executive Secretary Paquito Ochoa. 

Gihimo sa DTI ang pasidaan human makadawat na usab og reklamo gikan sa nagkalin-laing buhatan kalabot sa mga grupo ug indibidwal nga migamit sa pangalan sa maong mga opisyal sa gobyerno aron maka-solicit og kwarta. 

Sa report nga nadawat ni Domingo, modus sa grupo nga aghaton ang target nga buhatan ug mangayo og pondo nga gamiton alang sa nasudnon ug lokal nga eleksyon sa Mayo 13. 

Matud pa sa kalihim, hugot nga gidili sa DTI ang bisan unsang pag-solicit. 

Nanawagan sila sa publiko nga i-report sa ilang buhatan sa DTI direct 751-3330 o mahimo usab susihon ang legitimacy sa promo pinaagi sa www.dtincr.ph ang ingon niining matang sa modus aron mahatagan dayon sa tukmang aksyon. (PIA-Bohol/ecb/p-gg) 

=============

PNP, gibutang sa full alert status 

TAGBILARAN CITY, Bohol, May 06 (PIA)--Usa ka semana sa dili pa ang eleksyon, gi-deklarar na sa Philippine National Police (PNP) ang full alert status sa tibuok nasud. 

Matud pa ni Police Chief Superintendent Miguel Antonio, Deputy National Task Force Commander sa Secure and Fair Elections (SAFE) 2013, alas-6:00 ganinang buntag (Lunes) nahimong epektibo ang kamanduan. 

Giingong magpabilin ang full alert status hangtud dili kini imando nga tangtangon ni PNP Chief Allan Purisima. 

Una nang gi-bawal sa niaging semana sa pamunuan sa PNP ang pag-leave sa mga polis sa tibuok nasud. 

Giingong 989 ka polis na ang gi-aprubahan sa Commission on Elections (Comelec) nga mahimong escort sa mga kandidato hangtud Hunyo 12 sa pagtapos sa election period. (PIA-Bohol/ecb/i-sjp) 

=============

Mga kandidato sa probinsya sa Bohol, nihimo sa covenant signing 

TAGBILARAN CITY, Bohol, May 06 (PIA)--Nihimo og paglagdaay og kasabotan o covenant signing ang mga kandidato sa probinsya sa Bohol kagahapon sulod sa St. Joseph Cathedral. 

Dinhi ilang gipanaad nga ilang buhaton ang tanan aron mahimong malinawon ug hapsay ang piniliay karong Mayo 13. 

Gipangunahan ang maong kalihokan ni Bishop Leonardo Medroso sa Diocese sa Tagbilaran pinaagi sa santos nga misa sa alas 5:00 sa hapon. 

Ang pagpagdaay sa kasabotan gitambongan nilang Philippine National Police (PNP) Provincial Director PSSupt. Constantino Barot Jr., Commanding Officer sa 2nd Special Forces Battalion Lt. Col. Julius Tomines, Department of Interior and Local Government (DILG) Provincial Director Louella Lucino ug Commission on Elections (Comelec) Bohol OIC Lionel Marco Castillano. 

Gihimo sa tanang mi-kandidato sa provincial level gikan sa gobernador, bise-gobernador, kongresista, mga sakop sa sangguniang panlalawigan, mayor, bise-mayor ug mga konsehal ang paglagda sa kasabotan alang sa malinawon ug hapsay nga eleksyon. 

Kabahin usab sa maong kasabotan ang panawagan batok sa pagpamalit og mga boto. (PIA-Bohol/ecb/p-sjp)