Bag-ong “Bohol tourism” 

brochure gihipno, ipatik 

Rey Anthony Chiu

TAGBILARAN CITY, Bohol, June 10, 2013 (PIA) – Gihipno na ang mga katapusang datus sa dili pa ipatik ang bag-ong edisyon sa Bohol Tourism brochure, nga magsilbi nga pahinumdom ug kampanya sa mga turista nga mosuroy sa lalawigan. 

Didto sa usa ka tigum nga nahitabo didto sa Bohol Tourism Office, sulod sa Bohol Tourism Complex niadtong Biyernes, si Lourd Pocon kinsa maoy naghimo sa concept ug gidesinyo sa brochure mibutyag nga ang bag-ong brochure mahimo nga simpleng giya alang sa turista ug bakasyonero nga buot matagbaw sa Bohol.

Nasugyot usab sa mga nagkahiusang mitambong sa tigum nga himoon nga lang nga gaan sa mata ang brochure pinaagi sa pagpakunhod sa mga basahonon aron mas paspas ang pagsabot ug gaan ra kini sa panan-aw. 

Lakip sa mga mabasa didto sa bag-ong poster, nga matud pa, gipundohan sa kagamhanang probinsyal sa Bohol, ang kasaysayan sa lalawigan, nature niini, wildlife, adventure, festivals, ug uban pang mahinungdanong kasayuran nga buot sa usa ka bisita nga masukip sa mapa. 

Gawas sa mapa nga kanunay gayud nga sukip sa mga tourism materials nga sama niini, lakip na usab ang kasayuran sa mga kapuy-ang hotel ug mga katulganan sa Bohol, mga kan-anan, espesyal nga suroyanan, establisementong kan-anan, resorts, hotels, mga serbisyong pangturista ug mga sakyanan nga nagserbisyo sa mga turista.

Hinuon, gipasabot ni Josephine Cabarrus, hepe sa Buhatan sa Tourism Office (BTO) sa Bohol, nga dili tanang estabisemento kun dili kadto lamang mituod og hatag sa BTO sa mga gipangayo niining datus sa mga turista ang nasukip sa directory ug igkita sa mapa sa bag-ong brochure. 

Gidayeg ni Cabarrus, ang desinyo sa brochure dungan sa pagsumpay nga ang konsepto mahimo na nga dad-on alang sa international tourism fairs tungod sa kalidad sa kasayuran nga sukip niini. 

Gawas sa directories, mapa ug nga kasayuran sa mga nag-unang suroyanan sa Bohol, makit-an ug mabasa usab ang mubo nga pangatahuran ni Gob. Edgar Chatto, vice chairman sa Provincial Tourism council. 

Gipaabot nga mapatik na ang brochure sa sunod buwan, matud sa mga tinubdan.

============

“SanayGuro” magtudlo sa mga 

Magtutudlo sa katakus sa arte

Rey Anthony Chiu

TAGBILARAN CITY, Bohol, June 10, 2013 (PIA) – Gitak-opan ang laing yugto sa “SanayGuro” karong tuiga, pinaagi sa mga minugbo nga pasundayag sa arte didto sa mga lawak sa Dr. Cecilio Putong National High School (DCPNHS) niadtong Huwebes, 2013. 

Ang SanayGuro usa ka tinam-bayayongan nga kalihukan sa Department of Education (DepED) ug sa National Commission for Culture and the Arts (NCCA) aron bansayon ang mga magtutudlo sa nagkadaiyang disiplina sa arte. 

Kini magtabang aron bansayon ang mga estudyante nga hilig sa arte, pinaagi sa pagbansay sa mga magtutudlo aron ipaneguro nga may igo silang katakus nga hulma-on ang kabataan sa maayong ugma sa arte, pasabot ni Lutgardo Labad.

Si Labad Bol-anon nga NCCA Drama Committee Chair.

Kini aron ipaneguro nga may ikahatag gayud ang mga magtutudlo sa mga kabatan-onan nga mikuha sa kurso nga Special Program for the Arts (SPA) nga gitanyag alang sa pinili nga 17 ka high schools sa tibuok Pilipinas, dugang ni Labad. 

Ang DCPNHS usa sa 17 ka tunghaan nga natahasan sa NCCA ug DepEd nga makatudlo sa arte isip pamaagi aron mahimong mamugnaon ang mga leksyon nga ihatag sa mga kabatan-onan. 

Ang kapin na sa dekada nga programa nga gipatuman sa kagamhanan, nagpakita sa NCCA nga kini usa ka piskay nga paagi aron andamon ang mga kabatan-onan, ilabi na niadtong buot mosubay sa kaugma-on sa pagkamamugnaon. 

Aminado ang DepEd nga walay pormal nga bansay ang mga magtutudlo sa pagtudlo sa arte, mao nga gipasugdan gilayon ang mga bansay nga buksan samtang ang mga tunghaan nagtak-op kay bakasyon. 

Dinhi sa Bohol karong tuiga, gisagop sa DCPNHS ang mga magtutudlo sa Negros Occidental, Oriental, Cebu ug mga dapit sa kabisay-an kay dinhi sa Bohol nahitabo ang SanayGuro sa rehiyon. 

Upat ka pasundayag ang nahimo sa mga magtutudlo kinsa mitapos sa upat ka adlaw nga bansay. 

Lakip sa mga pasundayag ang: Pangayaw: usa ka Dance Drama sa mga taga timog, Tubig, Kinabuhi: usa ka dance drama nga gihimoan og linawas nga pasundayag gikan sa kanta ni Joey Ayala nga Ayala’s Bathala, gutling sa musical nga Sina Maria ug si Kiling, uban usab sa kataw-anan nga komentaryo sa kultura nga gihinganlan og Litaniya.