Bag-ong proyekto aron makalikay sa kalamidad, ilusad sa NDRRMC

TAGBILARAN CITY, Bohol, June 17 (PIA)--Ilusad sa National Disaster Risk Reduction and Management Council (NDRRMC) ang proyektong Disaster Information for Nationwide Awareness (DINA) diin katambayayong niini ang pribadong sector.

Tumong sa Project DINA nga magpakatap og impormasyon kun unsa ang mga angay buhaton kun wala pa niabot, kasamtangang nahibabo ug human sa panghitabo sa unsa mang kalamidad.

Ilusad kining maong proyekto pinaagi sa website sulod ning buwana.

Gawas niini, may paunang impormasyon kalabot niini pinaagi sa pagtan-aw sa ilang Panahon TV nga gipasundayag sa PTV4 matag buntag diin may mga balita sa panahon ug paghuman niini, adunay mga segment sila kalabot sa kalamidad nga kasagarang mo-igo sa atong nasud.

Katambayayong dinhi ang nagkalain-laing ahensya sa gobyerno apil na ang Philippine Atmospheric, Geophysical and Astronomical Services Administration (PAGASA), Philippine Institute of Volcanology and Seismology (PHIVOLCS), Presidential Communications Operations Office (PCOO), Philippine News Agency (PNA), Philippine Information Agency (PIA) ug NDRRMC aron ipahatud sa mas halapd nga audience ang mga angay buhaton sa panahon sa kalamidad. 

=============

DBM, nipagawas og P 4.5-B budget alang sa DepEd

TAGBILARAN CITY, Bohol, June 17 (PIA)--Gipagawas karon sa Department of Budget and Management (DBM) ang P4.5 bilyon budget alang sa Department of Education (DepEd) nga gigahin alang sa pagpatukod ug maintenance sa mga lawak-tunghaan ug alang usab sa mga sanitation facilities.

Matud pa ni Budget and Management Secretary Florencio Abad, parte kini sa gisaad sa administrasyong Aquino aron mapanindot ang kalidad sa edukasyon sa tibuok nasud.

Dugang pa ni Abad, gigahin ang P1.1 bilyon sa P4.5 bilyon alang sa classroom maintenance ug P3.4 bilyon usab ang sa sanitation facilities. 

“This latest release will be used to cover the repair and rehabilitation of our classrooms, including the necessary construction of water sanitation facilities in elementary and secondary public schools all over the country. As we start the academic year this month, we are also moving closer to our goal of closing all educational resource gaps boosting our public education system in the process,” matud pa ni Abad. 

Makapahimos sa gigahing pondo alang sa classroom maintenance ang Region III (P122-M), Region IV-A (P117-M), ug Region VI (P110-M), samtang igahin ang P3.4 bilyon alang sa Region III (P417-M), Region V (P397-M) ug Region VI (P304-M). (PIA-Bohol/ecb)