Ban sa Taiwan products, dili panimalos – Palasyo

TAGBILARAN CITY, Bohol, June 10 (PIA)--Gitataw sa Malakanyang nga walay kalabotan sa ‘diplomatic row’ sa Pilipinas ug Taiwan ang gipatuman nga ban sa food products gikan sa Taiwan ug dili usab kini panimalos sa unsa may desisyon o polisiya sa langyaw’ng teritoryo. 

Matud pa ni Deputy Presidential Spokesperson Abigail Valte, gihimo lamang sa Food and Drugs Administration (FDA) ang ilang trabaho ug dili kini panimalos sa mga gipatuman nga ‘sanctions’ sa Taiwan sa Pilipinas human sa pagkamatay sa mangingisdang Taiwanese sa kamot sa mga personnel sa Philippine Coast Guard (PCG) niadtong miaging buwan.

“The FDA is not singling out Taiwan, trabaho po nila talaga iyan at mandato nilang tingnan ‘yung mga produktong pumapasok sa ating bansa at alam po natin na kung hindi ho inaano ng BFAD (FDA) ay hindi ho natin dapat i-consume,” matud pa ni Valte.

Una nang gi-anunsyo sa FDA niadtong Sabado ang ban sa 15 ka food products gikan Taiwan nga napamatud-ang kontaminado og ‘maleic acid’ nga kasagarang gigamit sa paghimo og plastic ug automobile parts.

Miingon si FDA acting director D. Kenneth Hartigan-Go nga ang dugay nga pagkaon og high levels sa maleic acid makadaot sa kidney o bato sa tawo.

Ang mga food pro­ducts gikan Taiwan nga gi-ba­wal nga ibaligya sa Pilipinas mao ang: Hong Tapioca Starch, Redman Black Tapioca Pearl, Sun Right Indica Rice Powder, Top 1 Tapioca Pearls, Tea World Tapioca Starch Ball, Unbranded Starch Ball, Ding Long Tapioca Pearls, Sun Chi Noodles, T & M Resour­ces Corp. Tapioca Pearls, Pure Tea Tapioca Pearls (White), Pure Tea Tapioca Pearls (Black), Full Free Green Tea Tapio­ca Ball, Full Free Yam Tapioca Ball, Long Kow Vegeta­rian Instant Rice Noodle ug Long Kow Rice Noodle with Thick Soup. (PIA-Bohol/ecb)

============

Pagbutang og mga evacuation points,

gisugyot sa PCG sa mga brgy. officials

TAGBILARAN CITY, Bohol, June 10 (PIA)--Gisugyot sa Philippine Coast Guard (PCG) ngadto sa mga barangay sa tibuok nasud nga sayong magbutang og mga evacuation point ug flood warning signal devices alang sa panahon sa ting-ulan.

Matud pa ni Dr. Teddy Esguerra, officer-in-charge sa elite rescue team sa PCG, tuyo niining mapadali ang pagbakwit sa mga residente kun may mahitabong pagbaha.

Partikular nga gitumbok niini ang pagpaabot sa suhestyon sa mga barangay chairman nga nakasinati na og pagbaha sa ilang lugar.

Giingong andam ang PCG nga ipaubos sa pagbansay-bansay ang mga residente kalabot sa evacuation procedures kun gikinahanglan.

Gani, isip parte sa selebrasyon sa disaster preparedness week karong semanaha, gipaubos sa pagbansay-bansay sa water search and rescue sa PCG ang mga kawani sa 1st engineering combat company sa Philippine Army. (PIA-Bohol/ecb)