Mas hugot nga balaod sa gun ownership, gilagdaan ni PNoy

TAGBILARAN CITY, Bohol, June 03 (PIA)--Gilagdaan ni Presidente Benigno ‘Noynoy’ Aquino III ang Republic Act 10591 o gitawag nga “An Act Providing for Comprehensive Law on Firearms and Ammunition and Providing Penalties for Violations”.

Nahisulod niining balaod ang mga standards ug prerequisites sa dili pa makakuha og lisensya aron makapalit og bisan unsang matang sa pusil.

Nalakip niini nga kinahanglang Filipino citizen; 21-anyos pataas ang edad; adunay trabaho o negosyo ug naka-file og income tax return isip pagmatuod sa kita, profession, negosyo o trabaho.

Gawas sa daan nang requirement nga angay wala na-convict ang aplikante sa kasong may kalabot sa moral turpitude, mipasar sa psychiatric ug drug test, gi-dugang usab ang mga bag-ong requirements nga police clearance ug kinahanglang mipasar sa gun safety seminar ug suwat nga naglatid kun nganong kinahanglan niining manag-iya og pusil.

Nahisulod usab sa bag-ong balaod ang mas hugot nga proseso sa pagkuha og permit-to-carry outside residence ug angay pamatud-an nga may hulga gayud sa kinabuhi tungod kay mao kini ang himuong basehan aron tugotan kining magdala og pusil sa gawas sa panimalay. (PIA-Bohol/ecb)

=============

May bag-ong balaod na nga nag-regulate sa pagputol og punuan sa lubi

TAGBILARAN CITY, Bohol, June 03 (PIA--Gilagdaan ni Presidente Benigno ‘Noynoy’ Aquino III ang balaod nga nagbawal sa pagputol sa mga punuan sa lubi diin may silot nga 6 ka tuig ug multa nga P500,000 sa mga molapas niini.

Matud pa ni Deputy Presidential Spokesperson Abigail Valte, gilagdaan ni Presidente Aquino niadtong Mayo 29, 2013 ang Republic Act 10593 o “An Act Providing for the Regulation of the Cutting of Coconut Trees, its Replenishment, and Providing Penalties Therefore” nga nag-amyenda sa RA 8048.

Nahisulod sa bag-ong balaod nga angay mangayo og permiso sa barangay ug Philippine Coconut Authority (PCA) ang gustong moputol og punuan sa lubi. 

Kinahanglang mobayad ang aplikante og P100 matag punuan ngadto sa PCA.

Giingong ang tugotan lamang nga putlon kadtong mga lubi nga 60 anyos sa ‘tall variety’ ug 40 anyos usab alang sa ‘dwarf variety’ nga dili na produktibo o gitaptan og sakit o naigo sa bagyo.

Ang mapamatud-ang mosupak sa maong balaod may multang P100,000 hangtud P500,000 o pagkabilanggo nga 2 hangtud 6 ka tuig. Apan kun opisyal sa gobyerno ang mosupak niini, hangtud P1 ka milyon ang multa. (PIA-Bohol/ecb)

==============

Amyenda sa revised penal code, gilagdaan na ni PNoy

TAGBILARAN CITY, Bohol, June 03 (PIA--Ma-menosan na ang sentensiya sa mga binilanggo nga magbinuotan sa bilangguan human gilagdaan ni Presidente Benigno ‘Noynoy’ Aquino III ang Republic Act 10592 o “An Act Amending Articles 29, 94, 97, 98, and 99 of Act 3815, as Amended, Otherwise Known as the Revised Penal Code”.

Nakabutang sa Article 29 sa Revised Penal Code nga mahimo nang menosan sa mga local jail ang sentensiya sa usa ka binilanggo tungod sa “good behavior”.

Sa unang duha ka tuig nga pagkabilanggo, ang usa ka binilanggo mahimong menosan og 20 ka adlaw sa matag buwan kun magpakita og maayong gawi samtang naa sa bilangguan.

Sa ika-tulo hangtud sa ika-lima nga tuig, kuhaan og 23 ka adlaw matag buwan sa angay niyang pagkabilanggo kun magpakita pa gihapon siya og “good behavior”.

Samtang sa mga mosunod nga tuig hangtud ika-10 ka tuig, kuhaan og 25 ka adlaw matag buwan.

Nakalatid usab niining bag-ong balaod nga ang apela sa usa ka binilanggo dili mahimong babag aron dili siya mahatagan og allowance tungod sa maayong gawi. (PIA-Bohol/ecb)

=============

Pagpanigarilyo, gi-bawal na sa sulod ug palibot sa mga buhatan sa gobyerno

TAGBILARAN CITY, Bohol, June 03 (PIA)--Bawal na ang pagpanigarilyo sa sulod ug palibot sa mga buhatan sa gobyerno human magkauyon ang Civil Service Commission (CSC) ug Department of Health (DOH) sa kampanya batok sa pagpanigarilyo pinaagi sa paglagda sa Joint Memorandum Circular (JMC) No. 2010-01. 

Nagpasabot kini nga dili na mahimong manigarilyo ang tanang mga empleyado sa gobyerno samtang naa sa trabaho isip parte sa pag-atiman sa ilang panglawas.

Niadtong 1991 pa gi-bawal ang pagpanigarilyo sa mga government building pinaagi sa pagpagawas sa CSC Resolution No. 91-787, gawas lamang sa ubang palibot sa opisina nga gitakda isip smoking area.

Sa bag-ong kasabotan, ubos sa JMC sa CSC ug DOH, tangtanggon na ang mga smoking area sa gawas sa mga buhatan sa gobyerno aron mapatuman ang 100% smoke-free nga pagtarabaho sa mga empleyado sa gobyerno. 

Gawas niini, gi-bawal usab ang pagpanigarilyo sulod sa mga sakyanan sa gobyerno.

Mahimong matangtang sa serbisyo o mag-atubang og kasong administratibo ang empleyado sa gobyerno nga mapamatud-ang mosupak sa maong kamanduan. (PIIA-Bohol/ecb)