Pagpang-kidnap alang sa kidney 

Donation, “medical impossibility” 

Rey Anthony Chiu

TAGBILARAN CITY, Bohol, June 24, 2013 (PIA) – Usa ka medical impossibility ang napakalat nga hulga diin may gikatahong mga pagpangkidnap alang sa kidney organ donation. 

Kini maoy gibutyag ni Dr. Jose Benito Abraham, urologist consultant sa National Kidney Transplant Institute, kinsa mianhi sa Bohol alang sa pagpalapad sa kampanya sa pagbatok sa sakit sa kidney. 

Sa usa ka press conference didto sa Jjs Seafoods Village, gipangutana si Dr. Abraham, uban sa iyang mga kaubanan nga sila Drs. Susan Jorge, Reynaldo Lesaca, Elmer Kent Lopez ug Ariel Indo kon may kamatuoran ba ang pagpang-kidnap aron kuhaan sa kidney kay ihulip sa daut na nga kidney sa mga kwartahan.

Gipasabot usab ni Dr. Lesaca, transplant psychologist nga ang kidney usa ka sensitibo nga parte sa lawas ug kinahanglan kini nga ikasumpay sa buhi nga modawat niini sulod sa unom ka oras aron dili madaut ang bag-ong organ. 

Sa laing bahin, kinahanglan kini sa tukmang temperature, medical nga kondisyon ug pag-atiman, human kini mapupo pinaagi sa usa ka espesyalista nga doctor sa kidney, dugang ni Dr. Lesaca. 

Gawas niana, gisumpay ni Dr. Susan Jorge nga ang pagpupo sa kidney u gang pagkabit niini sa usa ka pasyente, dili mahimo sa usa ka lugar nga walay igo nga ekipo, walay mga espesyalista nga hanas ug walay tukma nga lugar. 

Dugang pa usab, ang tanan nga mga tambalanan nga naghimo sa kidney transplant, mga mananambal sa kidney, mga tig-opera ug mga pasyente nalista na sa usa ka national renal disease registry, mao nga sayon ra hibaw-an kon kinsay nay kapasidad nga magpa-opera.

Gawas pa, ang pagkutlo sa kidney ug pagkabit niini sa laing tawo, nagkinahanglan sa pipila ka buwan nga pagpangandam sama sa pagkuha sa tukmang blood-works, aron ilhon kon dili ba isalikway sa midawat ang bag-ong kidney, pagtuki sa mga makatakod nga sakit nga anaa sa mohatag og modawat sa kidney, paghimo sa pagtandi kon magkatugma ba ang duha ug pagtambag sikolohikal sa duha ka pasyente, dason pa ni Dr Lesaca. 

Kon wala niining mga lakang ang matuman, imposible nga ikataud, kon duna man ugaling kidney nga nakuha, sulti ni Dr. Abraham.

=============

“Coast Guard” may bukas 

nga posisyon sa Visayas

Rey Anthony Chiu

TAGBILARAN CITY, Bohol, June 24, 2013 (PIA) – Interesado ka ba nga mahimong sakop sa mapasigarbohong bahan nga anaa sa serbisyo sa Philippine Coast Guard?

Kon imong interes ang mahi-apil sa hataas nga tradisyon sa serbisyo sa yutang natawhan pinaagi sa pagpasakop o pagkahimong opisyal sa PCG, nan, niay talagsaong higayon. 

Gibutyag sa Station Commander sa Tagbilaran Coast Guard, nga si Commander Agapito Bibat, nga ania na usab ang Coast Guard Recruitment Program sa Coast Guard District sa Central Visayas. 

Subay niini, nagbukas ang kagamhanan alang sa pagpanawat sa bag-ong sakop ug opisyal sa ahensya. 

Alang sa mga interesado nga magpa-enlist sa PCG, kinahanglan lamang nga natural born Filipino, may maayong moral nga kinaiya, ulitawo o dalaga, 21-26 anyos ang panuigon alang sa interesado sa pagka-opisyal; ug 18-26 anyos alang sa pagka enlisted personnel.

Usab gikinahanglan nga adunay gitas-on nga 5’4 sa lalaki ug 5’2 sa babaye, naghupot sa baccalaureate degree, o may kasamtangang 72 ka units sa college o duha ka tuig nga training sa TESDA alang sa katakus sa mga trabahong anha sa barko.

Sa laing bahin, gikinahanglan ang PRC license o Civil service Eligibility alang sa gustong mahimong opisyal. 

Matud usab ni Bibat, mas hatagan ug unang higayon ang kadtong mitapos na sa maritime courses. 

Subay niini, kadtong tanang interesado mahimong lawasnong moduso sa ilang aplikasyon ngadto sa Nautical Department sa University of the Visayas sa Sanciangko Street sa Sugbo sa dili pa ang Hunyo 29 kanus-a himoon ang eksaminasyon.

Ang mga aplikante kon magduso sa ilang aplikasyon, nga makuha gikan sa Tagbilaran Coast Guard Station.

Kinahanglang usab disyente ang isuot niini, magdala na sa NSO Birth Certificate, Transcript of Records sa pagtungha, Diploma, duha ka 2x2 nga hulagway ug PRC license alang sa mga aplikante sa pagkaopisyal sa Junyo 29 pohon didto sa sugbo. 

Magdala usab og ballpen ug lapis alang sa initial screening sa dili pa mopailawom sa eksaminasyon sa PCG Aptitude Test nga himoon sa Hunyo 29. 

Alang sa dugang kasayuran, tawag sa Tagbilaran Coast Guard Station sa 412-0992.