‘Pilipinas Go4 Health’, gilusad sa DOH

TAGBILARAN CITY, Bohol, June 07 (PIA)--Gilusad kagahapon sa Department of Health (DoH) ang programang ‘Pilipinas Go4 Health’. 

Kining bag-ong programa gigahinan og pondo nga P10 milyon sa DoH. 

Matud pa ni DoH spokesman Asec. Eric Tayag, tuyo niining hingosgan ang public awareness ug hugot nga batokan ang mga non-communicable diseases (NCDs).

Gi-apil na usab sa DoH sa ilang mga kampanya ang pagpa-ila ug pag-amping aron dili maapektohan sa novel corona virus nga mipatay na og pipila ka tawo sa Middle East.

Apan gawas sa mga grabeng sakit, giingong mas kinahanglan sa mga Pinoy nga ampingan ang ilang panglawas batok sa diabetes, cancer ug chronic obstructive pulmonary disorder tungod kay mas daghan ang naigo niini sa atong nasud.

Gani, 54% kining mga sakita ang kasagarang hinungdan sa sayong kamatayon sa mga Filipino. (PIA-Bohol)

============

Mga residenteng naa sa coastal areas, 

gi-alerto sa PCG tungod sa LPA

TAGBILARAN CITY, Bohol, June 07 (PIA)--Gipahimangnuan sa Philippine Coast Guard (PCG) ang mga residente sa mga coastal areas sa nasud nga mag-amping tungod sa gipaabot nga pagdaku sa mga balud sa dagat tungod sa Low Pressure Area (LPA) sa Eastern Mindanao, Visayas ug Bicol Region.

Matud pa sa tigpamaba sa PCG nga si Commander Armand Balilo, bisan wala pa kaayo nabati ang dautang panahon, gitambagan na ang mga mangingisda ug mga residente sa mga coastal area nga magbantay ug alerto gayud.

Giingong gipaabot nga magdala og kusog nga ulan ang LPA.

Una nang gi-alerto ang mga rescue units sa PCG sa mga lugar nga posibleng maigo sa LPA aron mo-abag sa mga himuong lakang sa mga Local Government Units (LGU).

Nipahinumdom usab ang PCG nga kun mobundak na ang kusog nga ulan, mahinongdanong mag-andam ang publiko sa mga gamit pang-emergency sama sa flash light, baterya, food packs, limpyong ilimnon nga tubig, mga tambal, senina ug uban pa. (PIA-Bohol/ecb)