SSS, abli matag Sabado sa buwan sa Hunyo

alang sa pagparehistro sa mga kasambahay

TAGBILARAN CITY, Bohol, June 06 (PIA)--Abli ang tanang buhatan sa Social Security System (SSS) matag Sabado karong buwan sa Hunyo agig paghatag og kahigayonan sa mga amo ug kasambahay nga makaparehistro.

Kini human gilagdaan ni Presidente Benigno ‘Noynoy’ Aquino III ang Republic Act 10361 o Kasambahay Law niadtong Enero 18 ug epektibo na kini sugod adtong Hunyo 4.

Matud pa ni SSS President ug CEO Emilio de Quiros Jr., mang-isyo ang tanan nilang buhatan sa tibuok nasud og SSS number alang sa domestic workers ug household employer ID numbers sa Hunyo 8, 15, 22 ug 29.

Giingong tuyo niining mahimong miyembro ug mahatagan og benepisyo ang mga kasambahay nga naglangkob sa general househelp, yaya, kusinera, hardinero, labandera ug bisan kinsang nagbuhat og domestic work sa usa ka panimalay ubos sa Kasambahay Law ug Social Security Law.

Alang sa mga gustong magpa-miyembro, kinahanglang mag-fill out ug mosumitir og personal record form o SSS Form E-1 sa labing duol nga SSS branch.

Kinahanglang may kasukip kining photocopy sa birth o baptismal certificate, driver’s license, passport, Professional Regulation Commission (PRC) card o seaman’s book.

Gawas sa registration services, modawat usab ang SSS og bayad sa kontribusyon sa mga household employers.

Ubos sa Kasambahay Law, obligadong hatagan og mga social benefit ang mga katabang sama sa SSS, PhilHealth ug Pag-IBIG FUND.

Ang mga employer kinahanglan sa usab nga adunay kontrata sa mga katabang ug ipatala ang pangalan niini sa barangay.

Obligado na usab ang mga amo nga mohatag og 13th month pay sa ilang katabang kun usa ka tuig na kining nanilbihan ug hatagan og 5 ka adlaw nga leave with pay sulod sa usa ka tuig. (PIA-Bohol/ecb)

==============

Senior Citizens Party-list, nagpasalamat sa SC

sa pagpahunong sa ilang diskwalipikasyon

TAGBILARAN CITY, Bohol, June 06 (PIA)--Nagpasalamat ang Coalition of Association of Senior Citizens in the Philippines o Senior Citizens Party-list sa gipagawas nga status quo ante order (SQAO) sa Supreme Court (SC) nga nagpahunong sa gipahamtang nga diskwalipikasyon sa Commission on Elections (Comelec).

Una nang gi-pugngan sa SC ang diskwalipikasyon sa Comelec pinaagi sa temporary restraining order (TRO) ni Chief Justice Maria Lourdes Sereno sa proklamasyon sa uban pang midaug nga party-list.

Apan kagahapon, Miyerkules sa buntag, wala ratipikahi sa Korte Suprema ang TRO, apan nipagawas hinuon kini og SQAO alang sa Senior Citizens Party-list ug Abang Lingkod.

Matud pa ni Representative Godofredo Arquiza, pagmatuod kini nga wala pasagdi sa Korte Suprema ang mga mahinungdanong isyu, apil na usab ang mga gidaug-daug.

"Syempre natutuwa po ako, nagpapasalamat po ako sa ating mga justices at hindi po pinapabayaan 'yung tunay na isyu... Nagpapasalamat po kami sa Supreme Court na talagang maaasahan ng mga taong naaapi."

Kun padayon nang ma-proklama, duha ka lingkuranan sa Kongreso ang makuha sa Senior Citizens Party-list tungod sa 677,000 boto nga nakuha nila.

Nisaad si Arquiza og daghang programa alang sa mga senior citizens apil na ang pagbaton og representante sa tanang konseho sama sa sistema sa Sangguniang Kabataan (SK) ug pagpatukod usab og general hospital alang sa mga tigulang. (PIA-Bohol)