DILG nakigtagbo sa kalungsuran

Sa MDRM subay sa “Oplan Listo”

TAGBILARAN CITY, Bohol February 27 (PIA)—Gipadayag sa Department of the Interior and Local Government (DILG) ang nag-una tamdanan alang sa pagpangandam batok sa katalagaman, nga karon ipakanaug nga ngadto sa kabanayan. 

Ang "Oplan Listo" us aka nasudnong kalihukan nga gitumong aron ipahibaw sa tanang Pilipino ang kamahinungdanon sa pagpangandam, ug diin nagsukip sa mga lakang nga buhatonon sa wala pa, atul ug sa human na sa katalagaman.

Ang Oplan Listo gilauman nga magtatak na sa kinaiya sa pagpangandam ngadto na sa mga pamilya ug kabanayan, pasabut sa Regional Focal Person sa Disaster and Risk Reduction Management nga si Willie Jean Cabanag. 

Didto sa Provincial Roll-out sa Oplan Listo diin tumong niini ang pagpakanaug sa pagpangandam batok sa katalagman ngadto na sa kasayuran sa tanang sakop sa banay, si Cabanag midugang pagpasabut nga ang Oplan Listo may tulo ka bahin. 

Usa ka tinibuok ug lapad nga programang adbokasya nga mopalig-on sa pagpangandam sa mga local nga kagamhanan, ang Oplan Listo may Listo’ng Pamahalaang Lokal nga maghimong automatic nga sundon sa tanang katawhan subay sa lagda, ug sa pagminitor niini. 

Ikaduha ang Listong Pamayanan, diin hataga’g kapasidad ang komunidad pinaagi sa tabang gikan sa LGU ug ipakanaug ngadto sa komunidad. 

Ikatulo na niini ang Listo’ng Pamilyang Pilipino nga magasentro sa Family Development Sessions sa mga banay nga nagdawat sa conditional cash transfer ug sa mga tigum nga gipahaum uban sa pag-tambayayong sa Department of Social Welfare and Development (DSWD). 

Didto sa Provincial Roll-out and consultation, mitambong ang mga mayor, hepe sa mga kapolisan, bomberong sakop sa Bureau of Fire Protection, DILG ug mga sakop sa Municipal Disaster and Risk Reduction Management Councils. 

Matud sa DILG pinaagi ni Josie Montes, una na nga napang-apud apod sa DILG ang mga manuals nga naglista sa mga angayan nga buhaton sa mga mayor ilabi na sa pagpangandam, minimum nga buhaton sa critical nga pagpangandam ug sa mga gimbuhaton sa MLGOO, hepe sa PNP ug sa BFP sa lungsod. 

Niining tuiga, gitumbok sa DILG Bohol ang ambisyosong pagpahimong automatic sa pagpangandam sa katalagaman nga karon magsukad na sa matag banay, butyag ni DILG Bohol Provincial Director Louisella Lucino didto sa rollout nga nahitabo sa Bohol Tropics. (rac/PIA-7/Bohol) 

Mihatag si Provincial Disaster and Risk Reduction Management Council Chief Anthony Damalerio sa kasamtangang antas sa pagpangandam sa mga kalungsuran sa Bohol atul sa Rollout sa Oplan Listo sa DILG didto sa Bohol Tropics, Pebrero 27. (rac/PIA-7/Bohol)