Upat sa 10 ka tunghaan nanghawod 

sa bangga sa “essay, slogan writing” 

TAGBILARAN CITY, February 27, (PIA)—ihari-an sa mga tinun-an sa upat ka mga gitamud nga mga tunghaan sa Tagbilaran ang 2017 Essay Writing ug Slogan Writing Contests sa Philippine Statistics Authority (PSA). 

Nakuha sa Holy Spirit School pinaagi ni Monique Relampagos ang dungog isip labing hawod sa essay writing samtang wa magpa-iwit and Bohol Wisdom School pinaagi ni Natasha Jewel Avergonzado kinsa mikuha sa sunod nga ganti. 

Ang Holy Name University usab mipakita og katakus pinaagi ni Alicia Nicole Bomediano, sa iyang pagkuha sa ikatulo nga dapit sa kompetisyon. 

Sa slogan writing, ang BWS na usab ang miuna pinaagi ni Dayra Levitt Langcamon, ug gisundan sa HSS pinaagi ni Rossel Tita Marie Gingo. 

Ang Immaculate Heart of Mary Seminary, pinaagi ni Dan Raymond Russel Lajera mikuha sa ika tulo nga lugar sa tulo sa labing haum nga slogan. 

Sa pagsaulog sa buwan sa Pebrero isip Civil Registration Month, gisagop sa PSA ang tema nga “Pilipinong Rehistrado, Matatag na Kinabukasan ay Sigurado.” 

Matud ni Jessamyne Anne Alcazaren, hepe sa PSA sa Bohol, ang paghimo sa essay writing ug slogan writing maoy una nilang suway, human sa pipila n aka katuigan. 

Sa pagpangutana ngano, mibutyag ang PSA nga ilang tumong nga dalhon na ngadto sa kabataan ang adbokasya sa civil registration.

May dko pa nga suliran ang Pilipinas sa natad sa pagparehistro, ilabi na sa mga bag-ong inanak, nga nagminyo ug kadtong mga namatay na.

Gipasabut sa PSA nga ang pagparehistro dili lamang alang sa gobyerno, apan alang usab sa tawo aron mahatagan sa pangalan ug nasyonalidad. 

Ang pagpasukip usab sa pangalan sa kinatibuk-ang listahan sa mga molupyo sa nasud maggiya sa kagamhanan sa pagpahat sa iyang katigayunan aron maseguro nga ang tanan may igo nga pahat alang sa mga imprastraktura nga magamit sa matag usa. 

Dinhi sa Bohol, gitutokan karon ang maayong pagdawat sa Dr Celestino Gallares Hospital nga mahimong modelo sa tambalanan nga naghatag sa dinali-an nga pagrehistro sa bata nga gi-anak, matud sa PSA. 

Ang pagrehistro sa pagkatawo sa bata dili lamang alangs a stadistika apan alang usab sa iyang legal nga pagkabuhi nga maghatag sa ngalan, nasyonalidad, pag-ila sa kabanay ug pag-pahat sa kagamhanan sa serbisyo nga iya unya nga masinati ug matagamtam. 

Sa tagbilaran, 10 sa 12 ka tunghaan nga nagtanyag sa junior ug senior High Schools ang gitanyagan sa PSA sa imbitasyon alang sa bangga sa katakus sa pagsuwat. 

Napulo lamang sa mga tughaan hinuon ang mipadala sa ilang mga magsasalmot sa bangga nga didto himoa sa ikaduha nga andana sa Galeria Luisa Mall ning syudad. 

Ang mga tinun-an gipaubanan usab sa ilang tagsatagsa ka mga coaches ug mentors. (rac/PIA-7/Bohol)

Gidawat ni Monique Relampagos sa Holy Sprit School ang ganti nga salapi ug plake human niya kombinsiha ang mga hukom nga sila Venus Gloria (PSA), Prof. Noel Tuazon (HNU) ug PIA Bohol  sa essay writing nga siya ang labing hawod. Misaksi isab si PSA Bohol Jessamyne Anne ALcazaren. (rac/PIA7/Bohol)