PPOC mas buot nga sa Carmen 

tukoron ang drug rehab center 

TAGBILARAN CITY, February 28, (PIA)—Gidasonan sa mga sakop sa Provincial Peace and Order Council (PPOC) ang kabubot-on sa Bohol nga ipadayon na ngadto sa Carmen ang pagtukod sa usa sa pipila ka drug rehabilitation facility sa nasud. 

Kahinumduman nga niadtong unang buwan, gilagdaan na dinhi sa Bohol ang memorandum of agreement (MOA) tali sa Department of Health (DOH), Interior and Local Government ug sa mga mamumuhunang insik ang kasabutan sa katukoran sa 500 ka katre nga pasilidad sa pagpahiuli sa mga na-ungo sa drugas. 

Kahinumduman nga gibitbit mismo ni Cabinet Secretary Leoncio Evasco ang mga mamumuhunang insik dinhi sa Bohol aron maytukod ang ikaduha sa upat ka drug rehab center nga ipatukod sa nasud aron tabangan ang nagumon sa illegal nga drugas. 

Gikompirmar ni Gob Edgar Chatto nga mipahibaw na ang bahan sa Buhatan ni Presidente Rodrigo Duterte nga mahimong ibalhin na ang laraw sa katukoran sa pasilidad gikan sa Carmen ngadto na sa Ubay. 

Matud pa sa gobernador, nakita sa mga mamumuhunan ang kakuwang sa tubig og koryente sa nahisgutang lugar nga gitanyag alang sa pasilidad sa Carmen. 

Apan, gibutyag ni Col. Arnulfo Matanguihan nga giandam na sa mga militar ang lugar ug nakigsabot na kini sa mga katawhang nanimuyo sa luna nga tukoran sa pasilidad sa pagbalhin na. 

Gani, dugang sa hepe sa kasundalohan nga wala na tamni ang pipila ka luna kay ila na nga gipahibaw ang nagtikad nga gamiton na kining luna sa pasilidad. 

Ang military reservation sa Carmen nagyaka sa 42 ektaryas nga kapatagan sa Kapitunan, Carmen ug lima lamang ka ektarya ang gikinahanglan sa nahisgutang drug rehab center. 

Pinaagi ni Romeo Teruel, giduso ang pagpagawas og us aka resolusyon sa PPOC nga aghaton ang mga mamumuhunan nga dili na ibalhin ang nahisgutang laraw tungod kay ang Carmen mao pa gihapon ang may labing maayong lokasyon sa tanang gikonsederar nga lugar. 

Gitumbok usab ni Gob Chatto nga mas sayon ra nga solbaron ang suliran sa tubig og suga. 

Dugang sa gobernador nga mas maayo nga adto sa Carmen ang pasilidad dala na usab ka kon kini itukod sulod sa military reservation, may libre na nga tigpasiugda sa seguridad samaong lugar. 

Tungod niini, giduso sa konseho ang resolusyon nga itunol unya sa Malakanyang, butyag ni Chatto. (rac/PIA-7/Bohol)

Giduso sa PPOC pinangulohan ni Gob Edgar Chatto ang sugyot ngadto sa Presidente nga ipadayon na didto sa Carmen ang katukoran sa Drug Rehabilitation Facility inay ibalhin na sa Ubay dala sa kakuwang sa tubig ug koryente didto. Mipasalig usab ang PPOC nga mas sayun rang solbaron ang suliran sa suga ug tubig sa Carmen. (rac/PIA-7/Bohol)