Libre nga promosyon sa 

Bohol Film Commission

TAGBILARAN CITY, February 23 (PIA)--Libre nga promosyon alang sa mga lugar sa Bohol, dugang kapanarbaho-an ug mas mapataas nga kalidad sa paghimo og sine sa Bohol. 

Kini ang pipila lamang ka benepisyo nga makuha sa Bohol human gimugna sa Bohol pinaagi sa Executive Order ang Bohol Film Commission, Pebrero 22. 

Tumong sa Executive Order, nga hiusahon sa Bohol ang tabang alang sa mga kompanya nga mihimo og film shooting sa Bohol, o mogamit sa mga talan-awon ug lokasyon sa Bohol alang sa ilang mga salida. 

Niini, sa pagmugna ni Gob Chatto sa komisyon, opisyal na usab nga iduso sa lalawigan ang paggamit sa mga lokal nga actors, mga teknikal nga tigsuporta sa pagkuha sa lilas sama sa cameramen, lilghtmen, gaffer, boom operators, set producers, costume designers, make up artists, caterers ug uban pang suporta sa paghimo og salida. 

Buot usab sa maong mandu sa gobernador nga kagiyahan na ang ang mga buot mohimo sa mga pelikula gamit ang mga lugar sa Bohol agi og dugang pagpalapad sa kasayuran kabahin sa mga nindot nga talan-awon dinhi, paingon na sa pagkamugna sa Bohol nga Film Capital sa Pilipinas. 

Ang komisyon, nga karon gipangulohan ni Gardy Labad, nga makahatag usab og mga insentibo ang Bohol aron ma-eghat ang mga national ug international nga producers nga mopili sa Bohol isip location sa ilang mga salida. 

Matud sa gobernador, kasagaran sa mga Bol-anon natugahan sa natural nga mga talento ug may katakus sa arte ilabi na gayud sa pagpasundayag sa entablado ug sa duwa. 

Ang pagtukod sa Film Commission, daku og ikatabang aron kagiyahan ang mga may hilig sa darama ug pagpasundayag nga molambo pa ang ilang mga katakus. 

Mismo ang chairperson sa Film Development Council of the Philippines (FDCP) nga si Liza Diño Seguerra uban sa mga film makers nga sila si Hermie Cabrito (animation artist) ug Babe Ruth Villarama misaksi sa paglagda sa memorandum. 

Kini usab nga simpleng seremonyas nga gihimo didto sa Masion gitambongan sa mga nagkadaiyang representatnte sa mga sektor sa Bohol. (rac/PIA-7/Bohol)

Gitunol ni Gob Edgar Chatto ngadto kang Film Development Council of the Philippines (FDCP) Chair Liza Diño Seguerra ang handumanan sa Bohol sa pagkampanya sa FDCP nga makasinati sa Bohol ang ilang mga programa. Ang Bohol, pinaagi ni Chatto, nagmugna sa local nga Film Commission nga magpahiluna na sa kalihukan sa film development dinhi. (rac/PIA-7/Bohol)

a