Tzu Chi giaghat pagkurambos

alang sa "Bohol Youth Home" 

TAGBILARAN CITY, February 23 (PIA)--Gibitbit ni Gob. Edgar Chatto ang blue print alang sa gilaraw nga katukuran sa Bohol Youth Home ngadto sa Taiwan. 

Kini aron ihanyag ang proyekto nga kurambosan sa kagamhanan ug pribadong sektor.

Si Chatto, kauban sa dakong delegasyon sa nasud nga tua sa Taiwan karon. 

Kini maoy gibutyag ni Socio Economic and Environment Management (SEEM) Cluster Head Liza Quirog agi og pag-update sa mga sakop sa Gender and Development Council nga nagkatigum sulod sa Provincial Planning and Development Office, Pebrero 23. 

Kahinumduman nga ang laraw sa katukoran sa Bohol Youth Home, una na nga gipagawas aron kapunduhan sa kagamhanang Probinsyal. 

Ang Bohol Youth Home, maoy usa ka pasilidad nga sudlan sa mga kabatan-onan o menor de edad nga makahimo og salaud.

Gimandu na sa balaod nga dili mahimong itipo og bilangu-an ang kabataan nga menor de edad sa mga hamtong, sa rason nga mahimong hingtakdan na hinuon ang kabataan. 

Segun sa Juvenile Justice Law, ang mga menor de edad nga makahimo og salaud, itugyan ngadto sa Department of Social Welfare and Development (DSWD). 

Apan wala makapahimutang ang balaod sa probisyon alang sa mga katukoran sa ingon nga pasilidad dinhi. 

Tungod niini ug dala na usad sa tungod kay mga Bol-anon nga kabataan ang makabenepisyo sa maong pasilidad, nagpahat og P10 milyones ang lalawigan alang niini. 

Una na nga gilaraw nga itukod sa luna sa kagamhanang Probinsyal didto sa lungsod sa Bilar, ang Bhol Youth Home may lain na nga natumbok nga tukoran, bisan nga kini mobalor sa sobra sa gipahat sa lalawigan. 

Ang P10 Milyones nga pundo, kabahin lamang sa pahat alang sa proyekto nga magpahimo usab og usa ka kompleto nga lugar nga may kaugalingong playground, chapel, gilain nga mga dormitoryo sa babaye ug lalaki, admin building, training centers mga lawak klasehanan, kusina, ug mga umahan. 

Tungod niini, gihanyag na sa gobernador ang proyekto ug milaum siya nga ang TzuChi Foundation sa Taiwan mo tagad niini, dugang ni Provincial Social Welfare and Development Officer Carmelita Tecson. 

Bisan pa, natumbok na usab sa Kapitolyo ang lugar diin ipahimutang ang Bohol Youth Home, ug segun sa ilang una nga barangay assembly sa host community, maayo ang pag-abi-abi sa proyekto, dugang ni Tecson. (rac/PIA-7/Bohol)

Gihanyag na nga papundohan sa mga pribadong sektor lakip na ang TzuChi Foundation ang katukoran sa Bohol Youth Home, taho ni ESSM Cluster head liza Quirog samtang gibutyag usab ni OPSWD Carmelita Tecson nga may naandam na sila nga lugar tukoran sa maong pasilidad. (rac/PIA-7/Bohol)