Gob Chatto mimandu pagpanghinlo

pag-dawat sa mga bisita sa ASEAN

TAGBILARAN CITY, February 13 (PIA)—Gimandu ni Gob Edgar Chatto ngadto sa mga Bol-anon nga maghiusa aron init nga abibahon ang mga bisita nga sakop sa delegasyon sa Association of SouthEast Asian Nations (ASEAN).

Kahinumduman nga ang Bohol usa sa pipila ka mga lalawigan sa Pilipinas nga napili nga himo-an sa pipila ka mga tigum sa bahan nga gilangkoban sa napulo ka nasud ug mga observers niini. 

Subay niini, giawhag ni Gob Chatto ang mga opisyal sa kabarangayan sa Bohol sa paghimo sa mga lakang sa pagpanglimpyo ilabi na sa mga daplin sa kadalanan aron ikapakita ang kinaiya sa mga Bol-anon nga limpyo ug maabi-abihon. 

Una na nga gisugyot ni Provincial Tourism Council Chairman, Atty Lucas Nunag nagdto sa Local Organizing Committee Meeting nga unta malimpyo ang mga kadalanan ilabi na sa mg kaagi-an sa panahon nga nia na ang mga delegado sa ASEAN. 

Partikular nga gitumbok ni Atty Nunag ang mga samok tan-awon nga mga billboards ug pahinumdom sa mga produkto nga gipataka-an na lang og pabarug sa mga kadalanan, mga election campaign materials nga wala kuhaa ug mga sagbot nga nahibilin human agi-i sa mower ang mga road shoulders. 

Matud ni Chatto, nahimo na nga kinaiya sa mga Bol-anon ang pagpanglimpyo sa panahon sa pista. Nanghinaut siya nga alang sa ASEAN, ang kinaiya sa pista ang ipatigbabaw sa mga Bol-anon. 

Gawas sa pagpanghinlo, giagda usab sa gobernador ang mga kabarangayan nga magbutang og mga tarpaulin nga mag-abi-abi sa mga delegados. 

May mga standard nga design nga gisagop alang sa ASEAN, ug kini mahimong ma-ambitan gikan sa Buhatan sa Gobernador sa Bohol, pasabut ni Administrator Alfonso Damalerio II.

Magbutang usab og mga buntings sama sa ipangbutang kon may pista, papas ni PA Alfonso Damalerio. 

As aghat ni Gob Chatto, gibutyag usab ni Department of Interior and Local Government Provincial Director Louisella Lucino nga ilang ipahibaw ang mandu atul sa us aka dinungan nga barangay assembly nga mahitabo sa Marso. (rac/PIA-7/Bohol)