Kinatkatay gihari-an 

Sa bisekleta’ng 29’r

TAGBILARAN CITY, February 13 (PIA)—Wala maghimpos ang mga mountain bikers nga nagsakay sa mga mountain bikes nga nag ligid og 26 ug 27 ka pulgada, kay gihari-an sa usa ka Sugbo-anon nga tri-athlete ug nagsakay sa Scott nga may 29 ka pulgada nga ligid ang Open category sa bag-o lang gitapos nga 2nd Alicia Mountain Bike Festival. 

Si Donkey Sanchez, beterano nga atleta nga sakop sa Oz Racing team sa Sugbo og mananaug na sa daghang offroad nga mga lumba sa bisekleta sa Sugbo ang unang nakalabang sa finish line ibabaw sa Munisipyo sa Alicia sa labing kubos nga oras. 

Wala makasarang ang paningkamot sa tulo ka mga giilang kusgan nga mga Bol-anon nga nagkahiusa sa bahan nga nangukod kang Sanchez tungas sa mga bungtod sa Cambaol Alicia atul sa paduwa nga gihinganlan og Kinatkatay sa Binabaje. 

Milugwa ang bentaha ni Sanchez batok sa mga sakop sa Paseo de Loon nga sila Jonathan Pagaura ug Emmanuel Comendador dihang human sa kinatkatay sa kabungturan, mibali na alang sa dulhogon nga bahin gawas sa Cambaol sa dapit sa Sitio Binabaje. 

Bentaha jud ang 29’r Bay, mas dagko ang ligid labi nag ang nagsakay beterano na sa lumba ug endure rider pa gyud, tumbok sa us aka rider kinsa mitapos sa dul-an sa 13 kilometros nga circuit. 

Sa pagkahuman sa duwa, gisundan si Sanchez nila ni Jonathan Pagaura ug Emmanuel Comendador sa ika duha ug ika tulo nga dapit. 

Sa ikaupat, midaug usab si Emmanuel Pedroza, laing Sugbo-anong beterano sa lumba, dayon ikalima ang laing Bol-anon, taga Dagohoy nga si Victor Biongcog. 

Sa All Bohol category sa susamang lumba, nakuha ni Roger Torreon ang unang lugar samtang si renz magdura ang naa sa ika duha. Ikatulo usab si Ernesto Garcia samtang ikaupat si Ronnie Jorigue ug ika lima si Eric Rejes. 

Sa beginners, mihari sa Keith Salamanca ug gisundan usab ni Deven Valderosa. Ikatulo si Randy Boligon, dayon si Milo Melon ug ika lima na si Isidro Balag. 

Alang sa 45 years old and above, giharian kini ni Ven Amora samtang gisundan ni Concordio Bernales. Ika tulo usab si Alberto Escatron samtang ika upat si Eustaquio Cuadrasal ug ika lima si Dodong Castillon. 

Matud ni Mayor Marnilou Ayuban, malampuson ang ika duha nga Alicia Mountain Bike Festival. 

Sa imaging tuig, naa ra sa 26 ka biker ang misalmot sa paduwa sa labing lisud nga kinatkatay sa natad sa mountain bike, apan karon niabut na sa 48 ka bikers, dugang ni Mayor Ayuban. 

Matud usab ni Tourism Officer Godelia Lumogdang, ang Alicia, mipili sa ilang mga kabungturan isip nataran alang sa mountain biking samtang naningkamot ang lungsod nga ma-ugmad ang turismo sa ilang lugar.

Sa malampuson nga paghimo sa ika duhang MTB Festival, misalig ang mga opisyales sa lungsod nga ilhon na ang Alicia nga destinasyon sa mountain biking sports enthusiasts samtang ila usab nga kapanalipdan ang ilang kabungturan. (rac/PIA-7/Bohol)

Gidawat ni Donkey Sanchez sa Oz Racing Cebu ang plake, kwartang cash nga P 5 mil gikan ni Mayor Ayuban ug ni Bohol Tourism Offoce Rep Gina Kapirig. Si Sanchez maoy midaug sa Open Category sa Kinatkatay sa Alicia 2^nd MTB Festival Pebrero 12. (rac/PIA-7/Bohol)