Pagsuspenso sa PNP pagpanguna

Sa drug war, temporaryo lamang

TAGBILARAN CITY, February 14 (PIA)—Dili permanente ang kasamtangan nga pag-suspende sa pag-apil sa kapolisan sa paggukod sa mga drugista aron pagsumpo sa illegal nga druga. 

Kini ang tin-aw nga gipasabut ni Department of Interior and Local Government (DILG) Secretary Michael Sueño, sa iyang pagbisita dinhi sa Bohol. 

Didto sa Liga ng mga Barangay sa imaging semana, si Secretary Sueño, kinsa maoy pinasidunggang dinapit ug mamumulongmipasabut nagdto sa mga kapitanes sa Bohol nga ang pagpa-undang sa kapolisan sa paglambigit sa gukod sa hangtud lamang matapos ang paglimpyo sa hanay niini. 

Kahinumduman nga gipaundang una ni Philippine National Police Chief Ronald dela Rosa ang kapolisan sa pag-apil sa mga operasyon sa illegal nga drugas ibabaw sa mga pasangil nga may mga nangilkil hulip sa padangog.

Amy mga taho nga nadawat sa PNP Chief nga may mga kapolisan nga mohikoy og panakop sa mga nalista nga may kalambigitan sa illegal nga drugas aron pangayu-an kini’g salapi bugti sa pagpa-ipsot aron dili na matanggong sa bilangguan. 

Diha diha dayun, human usab sa kaso nga kidnapping ug pagpatay sa Koreano nag negosyante, gipalihok ni dela Rosa ang kapolisan aron tumbokon kon kinsa sa ilang hanay ang nagpahipi apan diay mangtas. 

“Sa sunod nga mga adlaw, may masakpan na gayud,” butyag ni Secretary Sueño. 

Gani, subay sa iyang pahayag, gipasundan pa kini sa pag-ingon: “Kinahanglan na nga padaghanon ang recruitment sa kapolisan, kay daghan gyud ang mataktak sa trabaho.”

Hinuon, mipasalig usab ang mga tinugyanan nga kon may kapolisan nga matumbok nga may illegal nga buhat ilabi na sa pagpanalipod sa illegal nag drugas, “ipatuman gihapon ang tukmang dagan sa balaod alang kanila.”

Mahibalik ra gihapon ang kapolisan, pasalig niya taliwala sa kahadlok nga sa pagatras sa kapolisan, miabante usab ang mga drugista nga gihidlaw na sa pagsuyop ug sa pagnegosyo sa illegal nag drugas. 

Dungan usab niini, gikompirmar usab sa kalihim sa interior and local government nga natunol na ngadto sa mga Regional Directors sa PNP ang mga listahan sa mga opisyales sa local nga kagamhanan nga nahilambigit sa illegal nga drugas. 

Hinuon, sukad nga nadawat sa mga Regional Directors sa PNP ang listahan sa mga nahilambigit sa illegal nga drugas sulod sa ilang areas or responsibility, wala pay tataw nga aksyon kon unsa na ang mahitabo. 

May nagpalubad na sa mga opisyales sa local nga mga kagamhanan nga mosuwat sila sa PNP Regional Director aron maka-ambit usab sila sa confidential nga listahan.

Hinuon, hangtud karon, wala pay miangkon nga local nga opisyal nga opisyal nang nahatagan sa kopya sa nahisgutang listahan. (rac/PIA-7/Bohol)

Hangtud malimpyo ang mga posibleng nalambigit sa kapolisan, magpadayon ang TOKHANG apan wala na unay labut ang policeagi-anan aron ipadayon ang gubat batok sa druga, matud ni Sec Mike Sueno, (rac/PIA-7/Bohol)