17 ka forest rangers gibansay 

batok sa sunog, sakit sa kahoy

TAGBILARAN CITY, March 23 (PIA)--Tulo ka adlaw nga bansaybansay ngadto sa 17 ka field personnel, kasagaran kanila forest rangers, ang gihatag sa Department of Environment and Natural Resources (DENR) aron kat-onan ang mga pamaagi sa pagtubag sa sunog sa kalasangan ug pagsumpo sa pagkatap sa sakit sa kahoy. 

Ang Forest Fire and Integrated Pest Management didto sa Bohol Plaza Resort and Restaurant, Dayo Hill, Mayacabac, Dauis nagsugod sa Marso 21 ug gitapos Marso 23, 2017. 

Aron hatagag bili ang kahoy sa kinabuhi sa tawo, matud ni DENR Bohol OIC PENRO Eusalem Quiwag, nga ang kahoy ingon ra ka mahinungdanon sa lima ka andana nga building. 

Sa ektarya ektarya nga kakahoyan, binilyon usab ang bili niini. 

Ug kon atong atimanon ang mga buildings, angayan lamang usab nga hatagan sa labing hugot nga pag alima ang kakahoyan ug panalipdan kini batuk sa sunog og mga dangan, aghat ni Quiwag. 

Segun sa tinubdan, gisugdan ang bansay sa pagpapresko sa kasayuran sa kadaghanan sa epekto sa nag-usab nga panahon, mga pamaagi aron pugngan kini ug ang pagadapt niining mga kabag-ohan sa panahon. 

Ang mga gibansay gi-orient sa DENR Administrative Order (DAO) 2012-05 - o ang mga giya sa pagpaniid, pagmonitor, pagpugong ug pagtaho kon may sunog sa lasang. 

Gawas pa niana, gimbuhaton usab sa forest rangers ang dungan nga pagka Forest Pest Surveillance ug Monitoring Officer (FPSMO). 

Gipahinumduman usab ang mga rangers nga maghimo og regular nga pagsusi ug pagduso sa mga taho ngadto sa CENRO kon may mamatikdang pagkatap sa dangan ug sakit sa kahoy, pinaagi sa pag fill up sa mga forma nga ipataban sa mga taho. 

Gitun-an usab didto ang mga natural nga pamatay dangan ug pangsumpo sa sakit sa mga kahoy samtang wala isalikway ang paggamit sa kemikal kon kini gikinahanglan aron pagluwas sa kahoy. 

Napulo og pito ka sakop nga forest rangers sa CENRO Talibon ug CENRO Tagbilaran City ang mitambong sa bansay bansay. (rac/PIA-7/Bohol)

Gitanda sa PIA Bohol ang usa sa mga gitan-aw nga Assisted Natural Regeneration projects sa DENR sa Danao samtang gibatbat sa mga forest rangers ang ilang laraw unsaon pagkontrolar sa sunog sa kalasangan nga nasukip sa ilang ANR.  (PIA-7/Bohol)