Malacanyang nalipay sa napakita

Sa survey sa kampanya sa drugas

CORTES, Bohol, March 26, (PIA)—Nalipay ang Palasyo sa resulta sa survey sa Pulsa Asia, nagpasabut nga ang kampanya sa kagamhanan, gidawat sa kadaghanan. 

Kini maoy unod sa pamulong ni Presidential Spokesperson Ernesto Abella, ning bag-o pa lamang. 

Kini human migawas ang resulta sa survey nga sa matag napulo ka residente sa Metro Manila, kapin sa walo niini mibati na nga mas luwas sila sa kadalanan karon tungod sa kampanya sa kagamhanan batok sa illegal nga drugas. 

Sa survey sa Pulse Asia gikan niadtong Disyembre 6 ngadto sa 11 2016, naopagawas ang kamatuoran bisan pa nga ang kapolisan gipa-undang una sa pag-apil sa kampanya sa drugas. 

Gipangutana ang random nga mga residente sa nagkadaiyang sector didto sa Manila: Kon itandi sa miaging tuig, nabati mo ba nga nga mas luwas na dinhi sa imong dapit tungod sa kampanya sa illegal nga drugas?

Niini, 82% sa mga gipangutana mibati nga mas luwas na sila sa ilang lugar human sugdi ang kampanya. 

Matud ni Spokesperson Ernesto Abella, nalipay ang kagamhanan sa labing bag-o nga resulta sa Pulse Asia.

Kini lamang nagpasabut nga ang kampanya sa kagamhanan batok sa illegal nga drugas gidawat og maayo sa yano nga katawhan, sahi sa gipatuo sa mga tigpanaway sa Presidente. 

Kining paborable nga sentimento sa kinabag-an naghatag kanato og dugang kaabtik nga i-duso pa ang kampanya sa illegal nga drugas samtang kanunay kita nga naglaum sa abag sa komunidad subay niini, dugang ni Abella. 

Gitukbil usab sa tigpamaba sa Presidente ang tabang nga gitanyag sa pipila ka kapari-an, ilabi na naidtong aktibo nga mipatuman sa mga programa sa pagpahiuli sa mga mitahan sa Oplan Tokhang, nga nakatabang og maayo. 

Sa pagpatinuod sa iyang saad sa panahon sa kampanya nga iyang papason ang illegal nga drugas, ang administrasyon ni Presidente Rodrigo Duterte mipailawom sa nasud sa usa ka lapad nga kampanya subay niini, sugod niadtong Hulyo.

Sa kampanya nga mas nailhan nga Oplan Tokhang, miresulta kini sa pagtahan ug pagkasikop sa sobra sa milyon ka mga drug pusher ug tiggamitan sa illegal nag drugas. 

Gani, subay usab niini, ang kinatibuk-ang kriminalidad sa nasud ming-usos sa 32% samtang misaka ang pagpatay ngadto na sa 50%. 

Apan sa mga nangita og bikil, gipasangil ngadto sa kampanya ang extra-judicial killings, nga karon, gilamoy usab sa international community. 

Ang mga tigpanaway, sama ni Bise Presidente Leni Robredo mialegar nga kapin na sa 7000 ang gipangpatay sukad pagsugod sa kampanya. 

Apan segun sa kasayuran nga natala sa kapolisan, naa lamang sa 2,500 ang mga suspitasado sa drugas nga napatay, tungod kay mingsukol sa mga tinugyanan sa balaod. 

Dugang sa kapolisan, kasagarang mga nangamatay, nabahig ilawom sa “deaths under Investigation” sa kapolisan. (rahc/PIA-7/Bohol)