Mga kawani sa NIA nasubo pagluwat 

ni Laviña, misaad mopaluyo ni Visaya

TAGBILARAN CITY, March 23 (PIA)--Gikasubo sa mga empleyado nga sakop sa National Irrigation Administration (NIA) ang pagluwat sa katungdaan ug napamubo nga serbisyo ni kanhi Adminstrador Peter Tiu Laviña.

Apan giabiba usab nila ang pagsulod ni retired General Ricardo Visaya isip bag-ong administrador human sa pagluwat ni Laviña uban sa panghinaut nga susama kang Laviña, si Visaya unta mahimong maka-empleyado, abin sa mag uuma ug molaban sa ahensya batok sa pangurakot ug mga hakug nga naghimo sa NIA nga gatasan. 

Sa 2017 lamang, matud sa NIA, kapin sa P37 Bilyones na ang nasuyop gikan sa NIA sa mga abusado. 

Sa usa ka nilagdaan nga pahayag, ang Press Relations Officer sa NIA Employees Association of the Philippines NEAEAP, nga si Victoriano Aron, namahayag nga sa hamubo nga higayon nga gikauban nila si Laviña, napakita niini ang matuod nga gugma ug suporta sa katungod ug kaayohan sa mga kawani sama sa mga benepisyo nga ila sa mga empleyado sa NIA. 

Ang lider sa may 6,000 ka sakop nga hugpong sa tibuok nasud, mibutyag nga si Laviña lamang ang nakapagawas sa 2016 Collective Negotiation Agreement Incentives (CNAI) sa mga kawani bisan pa sa pagsupak sa ubang sakop sa tagdumala tungod sa kahadlok nga dili mauyon niini ang Commission On Audit.

Gawas sa CNAI, sa wala pa mag -usa ka buwan isip administrador sa NIA, gimandu ni Laviña ang pagpagawas sa Uniform ug Clothing Allowance (UCA) sa mga kawani sa unang buwan sa tuig. 

Kini, matud ni Aron, sa nanglabay nga 20 na ka tuig, ang uniform allowance gipagawas sa tunga na sa tuig. 

Usa ka semana sa wala pa moluwat sa katungdanan si Laviña, gilibkas usab niya ang mandu sa pagsuspenso sa Viability Incentive Grant, usa ka performance-based nga benepisyo nga ihatag sa mga buhatan sa ug empleyado nga naghimog maayong performance. Kini napasuspenso sa nag-una nga administrador sa NIA ug naghikaw sa mga empleyado sa pag-tagamtam sa insentibo sukad pa sa 2014. 

Gawas niana, napaambit ni Laviña ang damgo nga ibalik sa NIA ang dungog nga labing hawod nga ahensya sa patubig sa kinatibuk-ang Asya, sugod na sa pagkombinse sa nga kawani ug mga Irrigators Association sa laraw ni Presidente Duterte sa libre nga patubig aron makalingkawas na sa utang ang kasagarang mag-uuma. 

Matud ni Aron, nakita nila ang sinseridad ni Laviña ug matuod nga tumong sa pagpamaayo sa kahimtang sa mga mag-uuma lakip na ang dugang giprogramang bansay sa mga opisyal ug empleyado aron mamahimong mas epektibo sa paghimo sa mga gimbuhaton niini. 

Apan bisan pa sa pagluwat ni Laviña sa katungdanan tungod sa dili na matabang nga pangurakot sa ahensya, misad ang NIAEASP nga mosuporta kang Visaya ubay sa panghinaut nga usab sama kang Laviña, moabin usab kini sa ahensya ug iyang ekawani. (rac/PIA-7/Bohol)