Tabang sa syudad sa Saulog

street dancers, P350 mil na

TAGBILARAN CITY, March 23 (PIA)--Napun-an sa P100 la libo ka pesos ang pinansyal nga tabang sa Syudad sa Tagbilaran ngadto sa mga barangay nga mosalmot sa Saulog Tagbilaran Street Dancing Festival. 

Kini maoy pahayag sa City Information Officer Fiel Angeli A. Gabin, didto sa Kapihan sa PIA nga nabati sa DyTR Huwebes Marso 23. 

Sa kanhi nga hinabang nga P250 ka libo, naa na sa P350 ka libo karon ang giandam sa kagamhanan sa syudad pinaagi ni Mayor John Geesnell Yap ug Bise Mayor Jose Antonio Veloso, matud ni Gabin. 

"Sayud kita unsa gayud ka dako ang gasto sa usa ka contingent nga may 80 ngadto sa 100 ka performers, sa costume, mga props, mga artistic directors ug ubang tigsuporta sa paghimo sa produksyon," patin-aw ni Gabin subay pagpadayag sa kabag-ohan sa tabang sa Saulog. 

Gawas pa, ang tabang makasugod sa kapanarbaho-an sa mga Tagbilaranon ug uban pang 

Ang Saulog streetdancing, nga naa na sa ika lima ka tuig karon, eksklusibo nga apilan sa 15 ka mga barangay sa Tagbilaran, padayag ni Gabin, ug mopasundayag sa kadalanan sa pista ni San Jose, Mayo 1 sa palis. 

Gipasigarbo usab ni Gabi si Mayor Yap tungod sa mga pagpaningkamot niini nga ipahimutang ang Tagbilaran sa mapa sa turismo sa tibuok nasud. 

Ang Saulog streetdancing, usa ka pagdayeg, pagpasudungog og pagpasalamat ngadto kang Senyor San Jose, kinsa maoy patron sa Tagbilaran. 

Ug dala sa pagkapanday ni San Jose, partikular nga bantayan sa mga tighukom sa bangga sa sayaw sa kadalanan ug ritwal ang mga sayaw nga magpakita sa pagsipilya, pagpanukdok sama sa panday. 

Ning mga higayuna, nagsugod na ang mga barangay sa Tagbilaran sa paghipno sa ilang pasundayag sa street dancing ug 5 minutos nga ritwal nga ipasundayag sa Mayo 1.

Ipasundayag sa mismong pista sa Tagbilaran, mobanaw sa CPG Avenue ang mga mananayaw sa 15 ka contingent sa Tagbilaran bitbit sa gipas-an nga karo sa San Jose, magsugod ang bangga sa alas 3 sa palis, hangtud na nga mahuman sa sayong kagabhi-on. (rac/PIA-7/Bohol)

P350 mil na ang itabang sa syudad sa matag Saulog Streetdancing contingent, butyag ni City Information Officer Fiel Gabin didto sa Kapihans a PIA. Kini matud niya, gamiton sa pagpangandam alang sa usa ka sadya nga presentasyon alang sa Saulog sa matag barangay. (rac/PIA-7/Bohol)