Treasure hunting nga way

Permits, isumbong sa NM

TAGBILARAN CITY, March 13, (PIA)—May mga treasure hunting nga mga legal, human ang mga nagpasiugda niini makakuha og pagtugot gikan sa mga ahensya nga hingtungdan. 

Kini maoy punto nga gipasabut ni National Museum Acting Assistant Director Angel P. Bautista sa nagkatapok nga mga cultural deputees sa Bohol nga nagkatapok didto sa Bohol Muesum, Marso 13. 

Ang mga cultural deputees, mga katawhan nga gisangunan sa National Museum aron tabangan ang ahensya sa kagamhanan sa pagpatuman sa mga mandate niini sama sa pagpanalipud ug pagpatunhay sa mga kabiling karaan, kapanulondan ug mga tinubdan sa katigayunan sa nasud. 

Niini, napangutana didto kon may katungod ba ang mga cultural deputees sa pagpa-undang ug pagpahunong sa mga pagpangitag katigayunan ilabi na sa mga kalungsuran. 

Subay sa balaod, ang tanang mga pagsuway sa pagkubkob og mga katigayunan, nagkinahanglan sa pagkuhag pagtugot gikan sa mga ahensya sama sa National Museum, Buhatan sa Presidente o sa Department of Environment and Natural Resources, matud ni Bautista. 

May mga balaod nga kabasehan sa paghimo sa treasure hunting sa Pilipinas ug lakip na niini ang Republic Act 4846 o ang "Cultural properties reservation and Protection Act, RA 10066 o ang Heritage Law samtang ang Buhatan sa Presidente pinaagi sa EO 46 natahasan sa mga paghatag og permits. 

Apan alang sa mga lugar nga may kasaysayan sa pagkakabilin, walay pagtreasure hunting nga tugotan ug permi kining isipon nga illegal, pahinumdom ni Bautista. 

Sa matag mamatikdan nga pagsuway sa paghimo niining mga nahisgutang buhat, hangyo sa mga tinugyanan nga isumbong gilayon ngadto sa National Museum aron masuta kon unsa ang mga gipangbuhat, dugang sugyot niya sa mga cultural deputees. 

Ang mga cultural deputees natahasan sa pag-abag sa cultural Properties Division sa National Museum (NM) sa pagpatuman sa mga balaod sa pagpanalipod ug pagpatunhay sa mga kabilin nga mga culturanhong kabtangan. 

Ang NM usab naghatag sa katungod sa mga kwalipikadong tawo nga mitabang sa pagpanalipod sa kapanulondan sa nasud. (rac/PIA-7/Bohol)

Gipasabut ni NM Acting Assistant Director Angel Bautista ang panginahanglan sa permits human namatikdang daghan sa Bohol ang nagpatuyang nalang og kawot sa yuta aron mangitag katigayunan. (RAC/PIA-7/Bohol)