Kasundalohan, nanapit nga kuygan

Alang Sa Bike for Peace, Miyerkules

TAGBILARAN CITY, March 13 (PIA) –Nanapit ang mga kasundalohan nga nia sa Bohol nga kuygan sila sa usa ka Bike Ride alang sa Kalinaw ug pagpananum og bakhaw. 

Alang sa mga interesado nga mokuyog, adto magtapok sa Plaza Rizal sa Tagbilaran sa als 4:30 sa yaong buntag sa Miyerkules. Marso 15. 

Unya human sa hamubong pasiuna nga kasayuran kabahin sa kalihukan, mogikan ang bahan paingon sa Calape subay sa Cortes, Maribojoc, Loon ug Panggangan nga isla sa Calape.

Didto sa Panggangan, mananum ang tanan og mga tongki sa bakhaw diin 5,000 ka lawngon ang unang gi-andam sa kasundalohan. 

Kini subay usab sa ika 36 nga katukoran sa 47th Infantry Battalion nga magsaulog sa ilang pagka mugna 36 na ka tuig ang milabay. 

Mismo ang hepe sa Civil Military Operations sa 47th IB nga si Captain Rigor Borja, mipasabut nga inay saulogan sa palulinghayaw, gipili sa 47th IB ang pag-alagad sa katawhan pinaagi sa pagtanum og mga bakhaw. 

Sa ila 36 nga kasumaran sa ilang katukoran, gisagop sa bahan ang tema nga "47IB, Tapat at Patuloy ng Maglilingkod Para sa Mamamayan ng Sentral Bisayas, dugang ni Capt. Borja. 

Kahinumduman nga mas lisud unta ang gimbuhaton sa mga kasundalohan dinhi apan human nadeklara ang Bohol nga insurgency free, ang mga kasundalohan pinangulohan ni Lt. Col Jose Dodgie Belloga nilingi na lamang hinuon sa pagpalig-on sa kalambigitan sa kasundalohan sa komunidad. 

Tungod niini, inay mga pusil ang hinagiban sa kasundalohan, mag daku pa ang higayon sa kasundalohan nga maghupot og pala ug mga martilyo aron pagduso sa ilang presensya sa kabarangayan. 

Dugang pa, napun-an na usab ang gimbuhaton sa kasundalohan, kana mao pa-ang pagpakigbatuk sa lisud nga kawad-an ug pagpamenos sa epekto sa nag-usab-usab nga panahon.

Ang Bike for Peace usa lamang sa mga kalihukan sa 47th IB sa ilang anibersaryo. (rac/PIA-7/Bohol)