ASEAN-PCOO roadshow sa Cebu,

gipangunahan ni Andanar

TAGBILARAN CITY, March 7 (PIA)--Gipangunahan ni Presidential Communications Operations Office (PCOO) Kalihim Martin Andanar ang 2017 ASEAN-PCOO roadshow sa syudad sa Sugbo niadtong Marso 3 sa Cebu Grand Convention Center.

Dul-an usa ka libo ang nitambong sa maong malampuson nga roadshow nga gilangkoban sa nagkalain-laing sektor.

Matud pa ni Andanar, tumong sa maong road­show nga mapasabot sa katawhan ilabi na sa mga nagpuyo sa lagyong dapit sa Sugbo ang kamahinungdanon sa pagpahigayon sa Association of Southeast Asian Nations (ASEAN) Summit diin ang Pilipinas ang host ning tuiga.

Dugang pa ni Andanar, mahinungdanong mapasabot sa matag Pilipino sa pinaka-yanong pinulongan ang kamahinungdanon sa ASEAN sa matag Pilipino ug kun unsa ang benepisyong makuha sa matag Pilipino niini.

Gipasabot ni Andanar nga gipahimoslan sa iyang buhatan ang maong roadshow aron mapaabot sa katawhan ang mga programa nga nahimo ni Presidente Rodrigo Duterte. 

Sa maong roadshow, gipasabot ni PCOO Assistant Secretary Kristian Ablan ang Freedom of Information (FOI) ug ang gilagdaang Executive Order No. 2 ni Presidente Duterte. 

Si Carlos Munda ug Princess Pebbles Duque sa PCOO nihisgot sa topic nga New Media Communications for Participatory Governance samtang gipasabot usab sa Executive Director sa Presidential Task Force on Media Security ang kalabot sa Administrative Order No. 1 ug ang Protection of Journalist. (ecb/PIA7-Bohol)

ASEAN-PCOO roadshow.  Mismong si PCOO Kalihim Martin Andanar ang nanguna sa gipahigayong 2017 ASEAN-PCOO roadshow sa Cebu Grand Convention Center, syudad sa Sugbo niadtong Marso 3 nga gitambungan sa dul-an usa  ka libong sumasalmot nga gilangkoban sa nagkalain-laing sektor sa katilingban. (ecb/PIA7-Bohol)