PIA info kiosk, 

gilusad sa MCIAA

TAGBILARAN CITY, March 7 (PIA)--Ang Philippine Information Agency (PIA) sa Rehiyon 7 nilusad niadtong Biyernes, Marso 3 sa duha ka information kiosks alang sa Association of Southeast Asian Nations (ASEAN) didto sa Mactan-Cebu International Airport (MCIAA) sa syudad sa Lapu-lapu, lalawigan sa Sugbo.

Ang maong PIA information kiosks nahimutang sa domestic ug international passenger arrival area sa MCIAA diin didto makita ang nagkalain-laing information materials kalabot sa ASEAN ug ubang programa ug proyekto sa gobyerno. 

Mismong si Presidential Communications Operations Office (PCOO) Kalihim Martin Andanar ang nanguna sa paglusad sa PIA information kiosk sa MCIAA, kauban ang mga dagkong opisyal sa PIA nga sila si PIA Director General Harold Clavite, PIA Deputy Director General Angelo Villar ug PIA-7 OIC Fayette Riñen.

Sa iyang mensahe atol sa paglusad sa PIA info kiosk, gitumbok ni Andanar ang mahinungdanong papel sa PIA sa paghatod sa impormasyon sa tibuok nasod, ilabi na sa masa kalabot sa mga polisiya ug mga serbisyo sa gobyerno.

Samtang matud pa ni PIA DG Clavite, gilusad ang PIA info kiosk aron mapahatod sa publiko ang mga impormasyon kalabot sa ASEAN, ilabi na ang kamahinungdanon niini ug ang mga benebisyong makuha niini sa matag Pilipino. (ecb/PIA7-Bohol)

PIA info kiosk sa MCIAA. Gipangunahan ni PCOO Kalihim Martin Andanar (nagdala sa ribbon) ang ribbon cutting agi og paglusad sa PIA information kiosk nga nahimutang sa domestic ug international passenger arrival area sa Mactan Cebu International Airport (MCIAA) niadtong Marso 3 sa Sugbo. (ecb/PIA7-Bohol)