Gob Chatto mimandu sa BEMO

Pagpahinlo sa Dauis-Panglao

TAGBILARAN CITY, March 6, (PIA)—Gimandu-an ni Gobernador Edgar Chatto ang buhatan ubos sa Kapitolyo nga maghimo og mga lakang aron ikapahigayon na sa labing dali nga panahon ang pagpanglimpyo sa magd kadalanan agi og pagpangandam sa tigum sa tunipong mga nasud sa ASEAN. 

“Panahon na tingali nga estriktohon na nato ang pagpatuman sa mga balaod,” sumbat ni Chatto didto sa tigum sa Local Organizing Committee (LOC) sa Association of South East Asian Nations (ASEAN).

Si Chatto, kinsa trirman usab sa LOC mipasabut nga iya nga tahasan ang Bohol Environment and Management Office (BEMO) sa paglihok alang niini.

UNa nga nga gibutyag ni Chatto nga bukharon sa Bohol ang red carpet welcome alang sa ASEAN, nga mohimo sa ilang tigum dinhi sa Abril pohon. 

Dili tanang lalawigan sa nasud ang sudlon sa mga delegados sa 10 ka nasud nga sakop sa ASEAN, maong buot ni Chatto nga mamahimong di hikalimtan ang byahe sa mga bisita dinhi. 

Didto sa ikaduhang lapad nga tigum sa ASEAN LOC, gimanduan ni Gob Chatto si Samuel Racho, hepe sa BEMO sa pagseguro nga mahimong modelo sa kalimpyo ang Dauis ug Panglao, ilabi na sa mga agi-anan nga subayon sa mga delegado ug senior officials sa ASEAN nga maghimo sa ilang tigum dinhi sa Abril 18-21. 

Kini usab samtang gidason sa ASEAN LOC nga ipaseguro sa mga tinugyanan sa kalungsuran sa Panglao ug Dauis nga ang ilang mga basura nahipos ug nabahig, tungod kay ang kadtong basura lamang nga tukma ang pagkabahig ang ikalabay sa buksan na unya nga Alburquerque Cluster Sanitary Landfill Facility. 

Gikataho na usab sa tinugyanan sa Departamento sa Turismo nga nagbase dinhi sa Bohol ang nasigpatan nga mga basura sa sementeryo sa Dauis, nga Makita nga gitapok lamang sa daplin sa kadalanan. 

Gawas pa, gihangyo usab sa DOT pinaagi ni Jaypee Orcullo sa Tagbilaran Office niini nga kon mahimo, ibalhin ang parkinganan sa garbage truck sa Tagbilaran kay possible kini nga dali rang makit-an kon adto sa kilid sa Cathedral iparking. 

Hinuon, gialegar usab sa tinugyanan sa Dauis nga may namatikdan silang mga tiglabay sa basura nga ibilin lamang sa kilid sa mga kadalanan, particular na niini ang mga langyaw nga manglabay sa kagabhi-on. 

Apan sa tono sa gobernador, tataw na ang iyang kasuko tungod sa hangtud karonm, wala pa mapasugdi nga pahpanglimpyo sa mga lugar nga apil sa kaagi-an sa mga delegados. 

Wala usab ibutyag sa gobernador kon may silot ba o premyo ang mga barangay nga epektibong nagpatuman sa mga clean-up activities. (rac/PIA-7/Bohol

Wala man matino kon may multa o wala, gimandu na ni Gob Edgar Chatto ngadto sa BEMO pinaagi ni Samuel Racho ang pagpahibaw sa kadaghanan sa Panglao ug Dauis nga sila maoy modelo sa pagpanglimpyo aron abi-abihon ang mga bisita sa ASEAN. (rac/PIA-7/Bohol)